ლონდონის სამეფო ოპერის თეატრმა ბრიტანეთის პრემიერმინისტრს, კირ სტარმერს მსოფლიო ბანის, პაატა ბურჭულაძის საქმეში ჩართვისკენ მოუწოდა — ინფორმაციას The Guardians ავრცელებს.

"71 წლის მომღერალს გამოსვლები ჰქონდა ლონდონის სამეფო ოპერის თეატრსა და ნიუ-იორკის მეტროპოლიტენ ოპერაში. ის თანამშრომლობდა ისეთ ლეგენდარულ ტენორებთან, როგორებიც არიან ლუჩანო პავაროტი, პლასიდო დომინგო და ხოსე კარერასი.

იგი დააკავეს მას შემდეგ, რაც საპროტესტო აქციას შეუერთდა პრეზიდენტის სასახლის წინ, საქართველოს დედაქალაქ თბილისში. გასულ კვირას მას შვიდწლიანი პატიმრობა მიუსაჯეს, რაც, როგორც პაატა ბურჭულაძემ სასამართლოს განუცხადა, მისი ასაკის გათვალისწინებით ფაქტობრივად უვადო სასჯელის ტოლფასია," — ასე ახასიათებს ბრიტანული გამოცემა პაატა ბურჭულაძეს.

ბრიტანეთის პრემიერმინისტრისადმი მიწერილ წერილში ლონდონის სამეფო ოპერის დირექტორი პიტერ კატონა წერს, რომ ბურჭულაძეს "სამაგალითოდ სჯიან, რათა ეს გაფრთხილება იყოს ყველასთვის, ვინც რეჟიმის წინააღმდეგ გაბედავს გამოსვლას".

"ბატონ ბურჭულაძეს წაყენებული ბრალდებები სრულად გაყალბებული და უკანონოა. მას მხოლოდ იმიტომ დევნიან, რომ მმართველი რეჟიმის მიმართ კრიტიკული პოზიცია აქვს," — წერს კატონა.

მისივე თქმით, ბურჭულაძეს ლონდონის სამეფო ოპერაში გამორჩეული კარიერა ჰქონდა და 1984 წლის დებიუტის შემდეგ არაერთხელ გამოსულა ამ სცენაზე. პიტერ კატონა იმასაც წერს, რომ მის მოწვევას მომავალშიც განიხილავენ.

"სამწუხაროდ, პაატა ბურჭულაძე ახლა საქართველოში არსებულ 100-ზე მეტ პოლიტპატიმარს შორისაა. ბოლო მშვიდობიანი დემონსტრაციების დროს 500-ზე მეტი ადამიანი დააკავეს, ხოლო 300-ზე მეტმა პირმა წამებისა და არასათანადო მოპყრობის შესახებ განაცხადა.

თქვენი ყურადღება და სოლიდარობა ძალიან მნიშვნელოვანი იქნებოდა ქართველებისთვის, რომლებიც ცდილობენ შეინარჩუნონ თავისუფლება, ადამიანის უფლებები და დემოკრატიული მომავალი," — ვკითხულობთ წერილში.

შეგახსენებთ, 4 ოქტომბრის საქმის ორგანიზატორებად მიჩნეული პაატა ბურჭულაძე, მურთაზ ზოდელავა, ლაშა ბერიძე, ირაკლი ნადირაძე, პაატა მანჯგალაძე, ირაკლი შაიშმელაშვილი, თორნიკე მჭედლიშვილი, ნიკა გვენცაძე, ირაკლი ჩხვირკია და გური ჟვანია სასამართლომ დამნაშავედ ცნო. ისინი სტრატეგიული და განსაკუთრებული მნიშვნელობის მქონე ობიექტის ხელში ჩაგდების მცდელობის, ჯგუფური ძალადობის ორგანიზების, ხელმძღვანელობის და მასში მონაწილეობის, ასევე საქართველოს კონსტიტუციური წყობილების ძალადობით შეცვლისაკენ და სახელმწიფო ხელისუფლების დამხობისაკენ საქვეყნოდ მოწოდების ბრალდებით გაასამართლეს.

მურთაზ ზოდელავას, პაატა ბურჭულაძეს, ირაკლი ნადირაძეს, პაატა მანჯგალაძეს და ლაშა ბერიძეს სასჯელის სახედ და ზომად 7-7 წლით თავისუფლების აღკვეთა განუსაზღვრა.

თორნიკე მჭედლიშვილს, ირაკლი ჩხვირკიას, გური ჟვანიას და ნიკა გვენცაძეს სასჯელის სახედ და ზომად 5-5 წლით თავისუფლების აღკვეთა განუსაზღვრა.