მთავრობის ადმინისტრაციის საკანონმდებლო ინიციატივით "საჯარო დაწესებულებაში შრომის ანაზღაურების შესახებ" კანონში ცვლილებები განხორციელდება. ცვლილებების მიხედვით, მთავრობის წევრების მოადგილეები სახელფასო დანამატების მიღებას შეძლებენ.

საქართველოს კანონმდებლობით მთავრობის წევრებს, სახელმწიფო რწმუნებულს და მუნიციპალიტეტის მერს სახელფასო დანამატისა და ფულადი ჯილდოს მიღება აკრძალული აქვთ. კანონის განმარტებით ბარათში ვკითხულობთ, რომ აღნიშნული აკრძალვა მთავრობის წევრებს, სახელმწიფო რწმუნებულს და მუნიციპალიტეტის მერს იმიტომ ეხებათ, რომ "ინტერესთა კონფლიქტი" არ წარმოიშვას — თუმცა კანონპროექტის ავტორების აზრით, "მათი მოადგილეების შემთხვევაში ამგვარი საფრთხე არ არსებობს, ვინაიდან, მათ (მოადგილეების) მიერ მიღებულ გადაწყვეტილებებს უშუალოდ აკონტროლებენ ზემდგომი თანამდებობის პირები".

"შემოთავაზებული ცვლილება მიზნად ისახავს მოადგილეების სხვა თანამშრომლებთან თანაბარ მდგომარეობაში ჩაყენებას," — ვკითხულობთ განმარტებით ბარათში.

რა შემთხვევაში მიიღებენ სახელმწიფო უწყებაში დასაქმებული მოადგილეები დანამატებს?

კანონპროექტში ვკითხულობთ, რომ მთავრობის წევრის მოადგილეს, სახელმწიფო რწმუნებულის
მოადგილეს და მუნიციპალიტეტის მერის მოადგილე სახელფასო დანამატებს მიიღებს:

  • ზეგანაკვეთური სამუშაოს და დამატებითი ფუნქციების შესრულებისათვის;
  • ღამის საათებში, დასვენების/უქმე დღეებში მუშაობისთვის;
  • ჯანმრთელობისათვის რისკის შემცველ სამუშაო პირობებში საქმიანობისათვის;

ფულად ჯილდოს კი მიიღებენ:

  • დაკისრებული ფუნქციების ზედმიწევნით და სანიმუშოდ შესრულებისათვის;
  • ხანგრძლივი და კეთილსინდისიერი სამსახურისათვის ან განსაკუთრებული სირთულის ან მნიშვნელობის დავალების შესრულებისათვის;

კანონპროექტის განმარტებით ბარათში ვკითხულობთ, რომ სახელფასო დანამატის ერთდროული ოდენობა არ უნდა აღემატებოდეს შესაბამისი თანამდებობისათვის გათვალისწინებული თანამდებობრივი სარგოს 1 თვის ოდენობას, ხოლო წლის განმავლობაში მიღებული მთლიანი სახელფასო დანამატის ოდენობა — თანამდებობრივი სარგოს წლიური ოდენობის 20%-ს.

ფულადი ჯილდოს შემთხვევაში, საჯარო დაწესებულებაში დასაქმებული პირის მიერ წლის განმავლობაში მიღებული ფულადი ჯილდოს საერთო ოდენობა არ უნდა აღემატებოდეს ამ პირის მიერ დაკავებული თანამდებობის თანამდებობრივი სარგოს წლიური ოდენობის 10%-ს.

გარდა სახელფასო დანამატებისა, იზრდება ადმინისტრაციული ხელშეკრულებით დასაქმებულთა რაოდენობა. ცვლილებების მიხედვით, საჯარო დაწესებულებაში ადმინისტრაციული ხელშეკრულებით დასაქმებულ პირთა რიცხოვნობა არ უნდა აღემატებოდეს საჯარო დაწესებულების მთლიანი საშტატო რიცხოვნობის 15%-ს.

"საჯარო დაწესებულებაში (გარდა მუნიციპალიტეტის აღმასრულებელი ორგანოსადმი
დაქვემდებარებული დაწესებულებისა) ადმინისტრაციული ხელშეკრულებით დასაქმებულ
პირთა რიცხოვნობა არ უნდა აღემატებოდეს საჯარო დაწესებულების მთლიანი საშტატო
რიცხოვნობის 15%-ს, ხოლო მუნიციპალიტეტის აღმასრულებელი ორგანოსადმი
დაქვემდებარებულ დაწესებულებაში ადმინისტრაციული ხელშეკრულებით დასაქმებულ
პირთა რიცხოვნობა არ უნდა აღემატებოდეს საჯარო დაწესებულების მთლიანი საშტატო
რიცხოვნობის 10%-ს. ამ შეზღუდვიდან გამონაკლისი დაიშვება საჯარო დაწესებულების
გადაწყვეტილებით, საქართველოს მთავრობის ადმინისტრაციის რეკომენდაციების
გათვალისწინებით," — ვკითხულობთ კანონპროექტში.