აფხაზეთის თვითგამოცხადებული რესპუბლიკის პრემიერმინისტრმა, არტურ მიქვაბიამ განაცხადა, რომ სოხუმი დაინტერესებულია იმ სარკინიგზო მაგისტრალის აღდგენით, რომელზეც საქართველოსა და სომხეთის მიმართულებით გადაადგილება აფხაზეთის გავლით იქნება შესაძლებელი. ამის შესახებ ინფორმაციას EkhoKavkaza ავრცელებს.

მიქვაბიას განცხადებით, აფხაზეთის მხარეს აღნიშნულ პროექტთან დაკავშირებით დიდი ინტერესი აქვს, რადგან ის ეკონომიკური თვალსაზრისით მომგებიანი იქნება, თუმცა ეჭვი აქვს, რომ საქართველო მას მხარს არ დაუჭერს:

"საქართველო მხარს არ დაუჭერს არ პროექტს, რადგან ამბობს, რომ ჩვენთან მოლაპარაკებებს არ აწარმოებს, ვინაიდან მიიჩნევს, რომ ჩვენ მის შემადგენლობაში უნდა ვიყოთ. ე.ი. საკითხს პოლიტიკური ხასიათი აქვს, მე კი მგონია, რომ ის ეკონომიკური თვალსაზრისით, საღი გონებით უნდა განვიხილოთ".

ზემოაღნიშნული სარკინიგზო მაგისტრალის გამოყენება 1992-1993 წლებში, აფხაზეთის ომის შემდეგ შეწყდა. მოგვიანებით რუსეთი აცხადებდა, რომ სოხუმი-თბილისი-ერევნის სარკინიგზო მაგისტრალის გამოყენების წინააღმდეგი არ იყო. ახლა კი ის მიიჩნევს, რომ მსგავსი პროექტების განხორციელება ყველა დაინტერესებული მხარის ურთიერთობების განვითარებისკენაა მიმართული.