საქართველოს მთავარი პროკურატურის ინფორმაციით, თბილისის საქალაქო სასამართლომ გაიზიარა მათ მიერ წარდგენილი მტკიცებულებები და განსაკუთრებით მძიმე დანაშაულის შეუტყობინებლობის ჩადენაში ბრალდებულები - დ.კ. და ა.ა. დამნაშავედ სცნო საქართველოს სისხლის სამართლის კოდექსის 376-ე მუხლით. დ.კ.-ს მიესაჯა პატიმრობა ორი წლით, ა.ა.-ს კი - ორი წლითა და სამი თვით.

საქმეში არსებული მასალების მიხედვით, ბექა შენგელიამ და ირმა ყოჩიაშვილმა 2016 წლის ოქტომბერში განიზრახეს ირმა ყოჩიაშვილის დედის, ლუბა ყოჩიაშვილის მკვლელობა. მათ თავიანთი მიზანი 19 ოქტომბერს აღასრულეს, გვამი ჩანთაში მოათავსეს და ავტომანქანით გადაიტანეს შენგელიას ბინაში, სადაც დაანაწევრეს. მოგვიანებით გვამი ნაგავსაყრელზე დაწვეს.

სასამართლოს გადაწყვეტილების მიხედვით, დ.კ.-მ და ა.ა.-მ აღნიშნული დანაშაულის შესახებ იცოდნენ, რაც არ შეატყობინეს სამართალდამცავებს. ისინი სწორედ ამ დანაშაულისთვის გაასამართლეს.

რაც შეეხება თავად მკვლელობის ჩამდენებს, ირმა ყოჩიაშვილს რამდენიმე თვის წინ 20-წლიანი პატიმრობა მიუსაჯეს, ბექა შენგელიას კი - სამუდამო.