თბილისის საქალაქო სასამართლოში, ე.წ. კანიბალიზმის საქმეში ბრალდებულ ბექა შენგელიას სასამართლომ უვადოდ თავისუფლების აღკვეთა მიუსაჯა, ხოლო ირმა ყოჩიაშვილს 20 წლის ვადით თავისუფლების აღკვეთა.

საქალაქო სასამართლოს ცნობით, ბექა შენგელიას მიმართ არ დადასტურდა მსხვერპლის სხეულის ორგანოს სხვაგვარად გამოყენების მიზნით წარდგენილი ბრალდება, ანუ მოსამართლემ იგი 109 მუხლის მე-3 ნაწილის ვ ქვეპუნქტით გაამართლა.

იგი დამნაშავეს სცნეს 109-ე მუხლის მე-2 ნაწილით, რაც გულისხმობს ჯგუფურად ჩადენილ განზრახ მკვლელობას, დამამძიმებელ გარემოებაში.

შინაგან საქმეთა სამინისტროსა და პროკურატურის თანამშრომლებმა, ერთობლივი ოპერაციის შედეგად, 19 წლის ირმა ყოჩიაშვილი 23 წლის ბექა შენგელია და 17 წლის ნინა ჩ. დამამძიმებელ გარემოებაში, ჯგუფურად ჩადენილი განზრახ მკვლელობის ბრალდებით დააკავეს.

ასევე დაკავებულია კიდევ სამი პირი, ამავე მკვლელობის შეუტყობინებლობის ბრალდებით.

შსს-ს ინფორმაციით, ბრალდებულებმა 2016 წლის 19 ოქტომბერს, წინასწარ შემუშავებული გეგმის მიხედვით, ერთ-ერთი ბრალდებულის დედა, 76 წლის ლუბა ყ. დანით მოკლეს.

გამოძიების ვერსიით, მკვლელობის შემდეგ, მოკლულის ცხედარი დიდი ჩანთით ბექა შენგელიას ნაქირავებ ბინაში გადაიტანეს, სადაც გვამი დაანაწევრეს და ორი ჩანთით გლდანის გაუქმებულ ნაგავსაყრელზე გადაიტანეს, ბენზინი დაასხეს და დაწვეს.