პარლამენტის ყოფილი თავმჯდომარე, დავით უსუფაშვილი, აშშ-ის ვიცე-პრეზიდენტს, მაიკ პენსს, შეხვდება. პენსი თბილისში დღეს, 31 ივლისს, 19 საათზე, ჩამოდის.

უსუფაშვილი მიიჩნევს, რომ საქართველოსა და ამერიკის ინტერესები თანხვედრაშია, ამიტომ საერთო პრიორიტეტია საქართველოსა და ამერიკას შორის გრძელვადიანი სტრატეგიული თანამშრომლობის გაღრმავება.

უსუფაშვილის თქმით, ის აშშ-ს ვიცე-პრეზიდენტთან შემდეგ სამ ძირითად საკითხზე ისაუბრებს:

  1. საქართველო, აღმოსავლეთით მთელს კონტინენტზე აშშ-ს და დემოკრატიული სამყაროს ყველაზე უფრო საიმედო პარტნიორია და ეს რეალობა მაქსიმალურად უნდა გამოვიყენოთ ჩვენი ქვეყნის უსაფრთხოების უზრუნველსაყოფად;
  2. საქართველოს მოქმედი და წინა ხელისუფლების დემოკრატიული პოტენციალი არ არის ის მაქსიმუმი, რაც ქართველ ხალხს გააჩნია. ჩვენ უახლოეს საპარლამენტო არჩევნებზე ამას დავამტკიცებთ. საამისოდ კი გვჭირდება ჩვენი ქვეყნის მეგობრების მეტი დახმარება, რათა საკონსტიტუციო თუ სხვა პროცესებში დაცული იყოს დემოკრატიის მაღალი სტანდარტები.
  3. საქართველოს ეკონომიკური ძლიერება და მოქალაქეების კეთილდღეობა არის აუცილებელი წინაპირობა, იმისათვის, რომ ქვეყანამ შეძლოს ღირსეული და საიმედო პარტნიორობა დემოკრატიულ სამყაროსთან. ამიტომ, ორივე მხარის ინტერესებშია საქართველოს გაძლიერებისთვის კომპლექსური და გრძელვადიანი პროგრამის შემუშავება, გარკვეულწილად „მინი მარშალის გეგმა“, რისი პრეცედენტებიც არსებობს მსოფლიოს სხვადასხვა რეგიონში.

რესპუბლიკური პარტიის ყოფილმა ლიდერმა და საქართველოს პარლამენტის ყოფილმა თავმჯდომარემ, დავით უსუფაშვილმა, 16 ივნისს შენების მოძრაობა დააარსა. მოძრაობის ლოზუნგია: "რაც კარგია ვუვლით, რაც ცუდია - ვცვლით, რაც გვაკლია - ვქმნით".