მოკლედ: საპროკურორო საბჭოს ინფორმაციით, გენერალური პროკურორის ვაკანტურ თანამდებობაზე, სულ 11 კანდიდატი დარეგისტრირდა.

• კანდიდატურების წარდგენის ვადა 27 ივნისს ამოიწურა.

დეტალები: დარეგისტრირებული იურისტი კანდიდატები არიან:

• პაატა შავაძე, რომელმაც საპროკურორო საბჭოს საკუთარი კანდიდატურა პირადად წარუდგინა;
• ვიქტორ ახალბედაშვილი, რომელიც ა.ი.პ. უფლებათა დაცვის ცენტრმა წარმოადგინა;
• დავით ბარბაქაძე, რომელიც ორგანიზაციამ მეგობრობის ხიდი — ქართლოსი წარმოადგინა.
• ალექსანდრე კობაიძემ, რომელმაც საპროკურორო საბჭოს საკუთარი კანდიდატურა პირადად წარუდგინა;
• ლაზარე ჯორბენაძე, რომელიც მოქალაქეთა პოლიტიკურმა გაერთიანებამ, პარტია საქართველომ წარმოადგინა.
• გიორგი გაბიტაშვილი — გენერალური პროკურორის მოადგილე, რომელიც წარადგინეს აკადემიური წრეების წარმომადგენლებმა, რომლებიც იმავდროულად პროკურორები არიან, და არასამთავრობო ორგანიზაცია — სამართლებრივი სისტემის განვითარების კვლევითმა ცენტრმა. გაბიტაშვილს მხარდაჭერა საქართველოს პროკურატურის 463-მა პროკურორმა და გამომძიებელმა გამოუცხადა.
• სალომე ჯანუაშვილი, რომელიც აკადემიური წრეების წარმომადგენლებმა წარადგინეს;
• ანდრონიკ სარიბეკოვი, რომელმაც საპროკურორო საბჭოს საკუთარი კანდიდატურა პირადად წარუდგინა;
• გრიგოლ გაგნიძე, რომელიც წარადგინეს არასამთავრობო ორგანიზაციებმა: სამართლის კავშირი, სიმართლის რწმენა, პოლიტიკის და სამართლის ობსერვერი, მართლმსაჯულების და დემოკრატიის განვითარების სააგენტო, ადამიანის უფლებათა დაცვისა და პატიმართა სოციალური უზრუნველყოფის საერთაშორისო ორგანიზაცია და თანადგომა ხელმოკლე და მოწყვლადი ფენებისათვის;
• დარეჯან ბუცხრიკიძე, რომელმაც საპროკურორო საბჭოს საკუთარი კანდიდატურა პირადად წარუდგინა;
• ლალი ბუნტური, რომელიც მოქალაქეთა პოლიტიკურმა გაერთიანება საქართველომ წარმოადგინა.

პროცედურულად: საქართველოს გენერალური პროკურორობის კანდიდატების შერჩევის წესის მიხედვით, საბჭო შეარჩევს გენერალური პროკურორობის არანაკლებ 3 კანდიდატს, რომელთა ერთი მესამედი მაინც განსხვავებული სქესის უნდა იყოს.

• გენერალური პროკურორობის კანდიდატად შერჩეულ პირებს საპროკურორო საბჭოს სხდომაზე ცალ-ცალკე ეყრებათ კენჭი.
• კენჭისყრა ფარულია. არჩეულად ჩაითვლება ის კანდიდატი, რომელიც მიიღებს მეტ ხმას, მაგრამ არანაკლებ საპროკურორო საბჭოს სრული შემადგენლობის ორი მესამედისა.
• თუ ორმა ან მეტმა კანდიდატმა ხმების თანაბარი რაოდენობა მიიღო, გადამწყვეტია საპროკურორო საბჭოს თავმჯდომარის ხმა.
• საპროკურორო საბჭო შერჩეულ კანდიდატს შესაბამისი წერილობითი დასაბუთებით წარუდგენს საქართველოს პარლამენტს.

კონტექსტი: 23 მაისს, საქართველოს გენერალურმა პროკურორმა, ირაკლი შოთაძემ თანამდებობა დატოვა. მისი თქმით, თანამდებობის დატოვების გადაწყვეტილება გართულებული ჯანმრთელობის მდგომარეობის გამო მიიღო, მკურნალობის პროცესს გადის და ამ მიზნით, საზღვარგარეთ იმყოფება.