მოკლედ: საქართველოს პრეზიდენტმა სალომე ზურაბიშვილმა განაცხადა, რომ 11 ივნისს, რვა საათზე, ახალგაზრდებს შეხვდება და არჩევნებთან დაკავშირებით მათ შეკითხვებს უპასუხებს.

  • ამის შესახებ ზურაბიშვილმა განაცხადა დღეს, 3 ივნისს, ორბელიანების სასახლეში, ოპოზიციური პარტიების ლიდერებთან შეხვედრის შემდეგ.

დეტალები: "იმ 4-5 თვეში, რაც არჩევნებამდე გვაშორებს, ახალგაზრდებზე ძალიან დიდი პასუხისმგებლობა იქნება, რომ ყველაფერში ჩართულები იყვნენ. საჭიროა, რომ უფრო კარგად ავუხსნა ის, რაშიც არ იყვნენ აქამდე ჩართული. ისინი სულ სხვა რამით იყვნენ დაკავებულები და მათი როლი იმაში, რომ პროტესტი საზღვარგარეთ გასულიყო, უმნიშვნელოვანესი და ბოლომდე დაუფასებელი იყო", — განაცხადა პრეზიდენტმა.

  • მისივე თქმით, დიასპორის წარმომადგენლები და ახალგაზრდები ერთად, ჯამში, მილიონ ნახევარი ხმაა:
  • "ჩვენი მოვალეობა, არაფერი გავაკეთოთ ისეთი, რომ ამ ადამიანებს დავუკარგოთ ნდობა და იმედი, რომ ჩაიქნიონ ხელი. ეს არის ჩვენი პასუხისმგებლობა და სხვა არაფერი, თორემ ისინი თვითონ მოიტანენ იმ გამარჯვებას, რასაც ევროპაში დაბრუნება ჰქვია".

კონტექსტი: დღეს, 3 ივნისს, 17-მა ოპოზიციურმა პოლიტიკურმა პარტიამ და 5-მა დამოუკიდებელმა დეპუტატმა ხელი მოაწერა "ქართულ ქარტიას", რომელიც პრეზიდენტმა სალომე ზურაბიშვილმა 26 მაისს წარადგინა.

  • ქარტია არის გეგმა, რომლით გათვალისწინებული ნაბიჯები, დოკუმენტის ხელმომწერმა პარტიებმა უნდა გადადგან, არჩევნებში გამარჯვების შემდეგ.

ოპოზიციური პარტიებიდან "ქართულ ქარტიას" ხელი მოაწერეს:

  • საქართველოს მწვანეთა პარტია — გია გაჩეჩილაძე;
  • სამართლიანობისთვის — ეკა ბესელია;
  • დროა — ელენე ხოშტარია;
  • გირჩი — მეტი თავისუფლება — ზურაბ ჯაფარიძე;
  • ევროპელი დემოკრატები — პაატა დავითაია;
  • კანონი და სამართალი — თაკო ჩარკვიანი;
  • ლელო საქართველოსთვის — მამუკა ხაზარაძე;
  • ახალი — ნიკა მელია;
  • მოქალაქეები — ქეთევან თურაზაშვილი;
  • ანა დოლიძე ხალხისთვის — კახაბერ დვალიშვილი;
  • თავისუფლება — ზვიად გამსახურდიას გზა — ირაკლი ჯამბურია;
  • სტრატეგია აღმაშენებელი — პაატა მანჯგალაძე;
  • ევროპული საქართველო — გიგა ბოკერია;
  • რესპუბლიკური პარტია — დავით ბერძენიშვილი;
  • ერთიანი ნაციონალური მოძრაობა — თინა ბოკუჩავა;
  • მოძრაობა სახელმწიფო ხალხისთვის — ნიკა მაჭუტაძე;
  • ეროვნულ — დემოკრატიული პარტია — ბაჩუკი ქარდავა.

დამოუკიდებელი დეპუტატები, რომლებმაც ქარტიას ხელი მოაწერეს:

  • ნატო ჩხეიძე
  • როსტომ ჩხეიძე
  • თამარ კორძაია
  • ხატია დეკანოიძე
  • არმაზ ახვლედიანი

"ქართულ ქარტიაზე" ხელს არ მოაწერენ პარტია გირჩი და გახარია — საქართველოსთვის.