მოკლედ: საქართველოს პარლამენტის ინფორმაციით, დღეს, 2 მაისს, საქართველოს პარლამენტში წითელი ზონა 14:00 საათამდე იმოქმედებს.

წითელი დონის დროს საქართველოს პარლამენტში არ დაიშვება არცერთი პირი, გარდა პარლამენტის აპარატის უფროსის მიერ, საფრთხის სპეციფიკისა და მისი თავიდან აცილების საჭიროების შესაბამისად განსაზღვრული პირებისა.

  • საქართველოს პარლამენტში აღარ გაიმართება ბიუროს სხდომა და პლენარული სხდომები.
  • ასევე, დღეს არც საქართველოს საგარეო საქმეთა მინისტრს, ილია დარჩიაშვილს მოუსმენენ. დარჩიაშვილი პარლამენტში მინისტრის საათის ფორმატში იყო მიწვეული.
  • საგარეო საქმეთა მინისტრს უნდა წარედგინა უწყების მიერ გაწეული მუშაობის ანგარიში და დეპუტატების კითხვებისთვის ეპასუხა.

ასევე იხილეთ: საქართველოს დასავლური კურსი საფრთხეშია — აშშ-ის სახელმწიფო დეპარტამენტი

დეტალები: პარლამენტი იუწყება, რომ 1-ელ მაისს, რუსული კანონის საწინააღმდეგო აქციაზე, აქციის მონაწილეების მიერ "პარლამენტის სასახლეზე განხორციელებული თავდასხმის შედეგად" დაზიანდა პარლამენტის შენობა და ინფრასტრუქტურა.

  • პარლამენტის განცხადებიდან: "ამ დროისთვის საქართველოს პარლამენტის სასახლეში, შესაბამის სტრუქტურებთან ერთად მიმდინარეობს გაწმენდითი და აღდგენითი სამუშაოები".
  • წითელი დონის გაუქმების შემდეგ, მოქმედებას დაიწყებს ყვითელი დონე, რა დროსაც ვიზიტორებს ეზღუდებათ პარლამენტის სასახლეში შესვლა. შენობაში დაიშვებიან მხოლოდ საქართველოს პარლამენტის თანამშრომლები.

კონტექსტი: 1-ელ მაისს, რუსული კანონის საპროტესტო აქციაზე, 9 აპრილის ქუჩაზე, გაუშვეს ცრემლსადენი გაზი და წყლის ჭავლი. გამოიყენეს რეზინის ტყვიებიც.

  • სპეციალური საშუალებები, მოქალაქეების წინააღმდეგ, გაფრთხილების გარეშე გამოიყენეს.
  • დაახლოებით 22:00 საათიდან, შსს მშვიდობიანი დემონსტრანტების წინააღმდეგ დროდადრო იყენებდა წიწაკის სპრეის, ცრემლსადენ გაზს, წყლის ჭავლს. სამინისტრომ თქვა, რომ არ გამოუყენებიათ რეზინის ტყვიები, იმის მიუხედავად, რომ დაშავებულებს სავარაუდოდ, რეზინის ტყვიებისგან მიყენებული დაზიანებები აღენიშნებოდათ.

ჯანდაცვის სამინისტროს ინფორმაციით, რუსული კანონის საწინააღმდეგო აქციაზე 8 დაშავებულის ჰოსპიტალიზაცია გახდა საჭირო.

  • დაშავებულებს აღენიშნებოდათ სხვადასხვა სახის დაზიანებები, მათ შორის: ჭრილობები სახის, თავისა და სხეულის სხვადასხვა ნაწილზე, ასევე — ინტოქსიკაცია და სასუნთქი გზების გართულებები.