მოკლედ: ევროპარლამენტარებმა — დევიდ მაკალისტერმა, სვენ მიქსერმა და მარინა კალიურანდმა ერთობლივი განცხადება გაავრცელეს. ისინი ეხმიანებიან საპარლამენტო უმრავლესობის მიერ, კანონპროექტის პირველი მოსმენით მხარდაჭერას. ევროპარლამენტარები გამოთქვამენ შეშფოთებას იმის გამო, რომ ხელისუფლებამ გამოიყენა სპეცრაზმი დემონსტრანტების დასაშლელად.

განცხადება: "ჩვენ ღრმად შეშფოთებულები ვართ საქართველოში მმართველი პარტიის მიერ “უცხო გავლენის გამჭვირვალობის შესახებ” კანონპროექტის ხელახლა შეტანის გამო.

• ეს კანონი, რომელიც გუშინ პარლამენტმა პირველი მოსმენით მიიღო, თავდასხმაა დამოუკიდებელ მედიასა და სამოქალაქო საზოგადოების ორგანიზაციებზე.
• კანონი შეუთავსებელია ევროკავშირის ღირებულებებთან და დემოკრატიულ პრინციპებთან, ეწინააღმდეგება საქართველოს ევროკავშირში გაწევრიანების ამბიციებს და საფრთხეს უქმნის ქვეყნის ევროატლანტიკურ ინტეგრაციას.
• მოვუწოდებთ საქართველოს მთავრობას და პარლამენტს, არ უღალატონ ქართველი ხალხის უმრავლესობის მისწრაფებებს და სამოქალაქო საზოგადოებისთვის ხელსაყრელი სამუშაო გარემოს უზრუნველსაყოფად საერთაშორისო პარტნიორებთან ითანამშრომლონ.

ჩვენ შეშფოთებულნი ვართ სპეცრაზმის მიერ საკამათო კანონპროექტის წინააღმდეგ დემონსტრანტების დასაშლელად სპეცრაზმის მიერ ძალის გამოყენების გამო. მშვიდობიანი საპროტესტო აქციების უფლება ფუნდამენტური უფლებაა და მკაცრად უნდა იქნას დაცული, განსაკუთრებით, ევროკავშირის წევრობის მსურველ ქვეყანაში. მშვიდობიანი მომიტინგეების მიმართ ძალის გამოყენება არ შეიძლება იყოს გამართლებული.

• მოვუწოდებთ საქართველოს მთავრობას, უზრუნველყოს გამოხატვისა და შეკრების თავისუფლების დაცვა და თავიდან აირიდოს ძალადობის ესკალაცია.
• ჩვენ ვადასტურებთ ჩვენს ურყევ მხარდაჭერას ქართველი ხალხის ლეგიტიმური ევროპული მისწრაფებების მიმართ და შეგახსენებთ, რომ ევროკომისიის მიერ განსაზღვრული შესაბამისი ნაბიჯები ჯერ კიდევ განსახორციელებელია."

კონტექსტი: 83 ხმით 0-ის წინააღმდეგ, ქართულმა ოცნებამ რუსული კანონი პირველი მოსმენით მიიღო გუშინ, 17 აპრილს. ამას მოჰყვა მასშტაბური სახალხო პროტესტი თბილისში, ჯერ საქართველოს პარლამენტის წინ, შემდეგ — მთავრობის ადმინისტრაციის შენობასთან. ხალხი რუსული კანონის მიღებას აპროტესტებს საქართველოს დიდ ქალაქებშიც.

პროცედურულად: ზოგადად, კანონპროექტის მისაღებად საჭიროა დეპუტატების სამი მოსმენით მხარდაჭერა პლენარულ სხდომაზე.

• რუსული კანონის საბოლოო, მესამე მოსმენით მხარდაჭერის თარიღად 17 მაისია განსაზღვრული.
• კანონი, მიღების შემთხვევაში, პრეზიდენტს გადაეგზავნება.
• პრეზიდენტის საპარლამენტო მდივანმა თქვა, რომ სალომე ზურაბიშვილი კანონს ვეტოს დაადებს.
• თუმცა, ამის შემდეგ, საპარლამენტო უმრავლესობა ვეტოს დაძლევას შეეცდება, მას დასაძლევად საკმარისი მანდატი აქვს.