ინფოგრაფიკის კონტექსტი: 2024 წლის 3 აპრილს მმართველმა პარტიამ დაარღვია ერთი წლის წინ დადებული პირობა, რომ აღარ მიუბრუნდებოდა რუსული კანონის მიღების საკითხს.

  • გასული, 2023 წლის მარტში, ანალოგიური კანონპროექტის ინიციირებას ხალხი პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით. შემდეგ კი, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო და თქვა, რომ საკითხს აღარ მიუბრუნდებოდა: "მე, პირველ რიგში, გარანტიას გაძლევთ, რომ რუსული კანონი საქართველოს პარლამენტში არასდროს დაინიციირდება, ყოველ შემთხვევაში, ჩვენი ხელისუფლებაში ყოფნის პერიოდში. ნაცმოძრაობაზე თავს ვერ დავდებ, მაშინ იყო რუსული კანონები", — განაცხადა დღევანდელმა პრემიერ-მინისტრმა ირაკლი კობახიძემ 2023 წლის 9 მარტს, როდესაც ის მმართველი პარტია ქართული ოცნების თავმჯდომარე იყო.

რუსული კანონპროექტის მიმართ უარყოფითი დამოკიდებულება აისახა ეროვნულ-დემოკრატიული ინსტიტუტის (NDI) მიერ, 2023 წლის მაისში გამოქვეყნებულ კვლევაშიც. მათ მიერ გამოკითხულთა ნახევარზე მეტმა — 53-მა პროცენტმა, თქვა, რომ პარლამენტს უცხოური გავლენის გამჭვირვალობის შესახებ კანონი არ უნდა მიეღო.

NDI-ის თანახმად, კვლევის საველე სამუშაოები 2023 წლის 17-23 მარტს, სატელეფონო გამოკითხვის მეთოდით ჩატარდა, შემთხვევითი შერჩევის გზით, ქართულ, აზერბაიჯანულ, სომხურ და რუსულ ენებზე.

  • ჩატარდა სულ 1 032 დასრულებული ინტერვიუ (14% გამოპასუხება).
  • კვლევა საქართველოს მთლიანი მოსახლეობის (ოკუპირებული ტერიტორიების გარდა) წარმომადგენლობითია და შედეგების ცდომილების ზღვარი 2%-ია.
  • კვლევა ჩაატარა CRRC-საქართველომ NDI-ის დაკვეთით.

ფორსეტის მიერ მომზადებული ეს ინფოგრაფიკა სწორედ NDI-ის გასული წლის საზოგოგადოებრივი განწყობის შედეგებს აჩვენებს. ამ საკითზე სხვა, უფრო ახალი კვლევა ჯერ არ ჩატარებულა და შესაძლოა, არ ასახავდეს საზოგადოების განწყობებს 2024 წლის მარტისთვის, იმის გათვალისწინებით, რომ ხელისუფლებამ გასულ წელს დადებული პირობა გატეხა.

ფოტო: Forset

გაიგე მეტი: რატომ არის ქართული ოცნების კანონი რუსული — მოკლედ და მარტივად