მოკლედ: საქართველოს პრემიერ-მინისტრი ირაკლი კობახიძე აცხადებს, რომ მოსამართლეთა ვეტინგი "შეუსაბამოა" საქართველოს კონსტიტუციასთან, სახელმწიფო სუვერენიტეტის და სასამართლოს დამოუკიდებლობის პრინციპებთან.

  • ამის შესახებ დღეს, 19 მარტს, ირაკლი კობახიძემ მედიასთან ისაუბრა.

დეტალები: კობახიძის თქმით, ვეტინგი, შეიძლება განხორციელდეს "უკიდურეს გამონაკლის შემთხვევაში", სადაც "სახელმწიფო თავად აღიარებს, რომ მას აქვს შეუმდგარი ინსტიტუტები".

  • "მაგალითად, უკრაინის და მოლდოვის საქმე იყო იმის აღიარება, რომ მას აქვს შეუმდგარი ინსტიტუტები და ამას აქვს მყარი საფუძველიც, იმიტომ, რომ მართლა ძალიან სუსტია მათი ინსტიტუტები, მაგრამ საქართველოში თქვენ იცით, რომ 2012 წლის შემდეგ გვაქვს ფუნდამენტური პროგრესი ყველა მიმართულებით, მათ შორის სასამართლოს მიმართულებით", — განაცხადა ირაკლი კობახიძემ.
  • მისივე თქმით, საქართველოში, 2012 წლამდე, სასამართლო გამოიყენებოდა როგორც "რეპრესიული მანქანის ერთ-ერთი მთავარი ინსტრუმენტი", რაც "აისახა სასამართლო სტატისტიკაზე, სტრასბურგის სასამართლოში მიმართვიანობის სტატისტიკაზე და ბევრ სხვა ფაქტორზე".

კონტექსტი: ევროკომისიამ, სასამართლო სისტემის გაჯანსაღებისთვის 2023 წლის 11 ნოემბრის ანგარიშში დაწერა, რომ:

  • "საჭიროა იუსტიციის უმაღლესი საბჭოს უფრო საფუძვლიანი და ყოვლისმომცველი რეფორმა, რათა დაეხმაროს სასამართლო ხელისუფლების დამოუკიდებლობისა და მიუკერძოებლობის შემდგომ კონსოლიდაციას, გააუმჯობესოს საზოგადოების ნდობა და გადაჭრას საჯაროდ აღქმული კორპორატივიზმისა და კეთილსინდისიერების პრობლემები იუსტიციის უმაღლეს საბჭოში.
  • სისტემური გამოწვევების გადასაჭრელად, როგორც ვენეციის კომისიამაც აღნიშნა 2023 წლის ოქტომბრის დასკვნაში, საჭიროა, უფრო საფუძვლიანი და სისტემური კეთილსინდისიერების შემოწმება, რეგიონში დამკვიდრებული საუკეთესო პრაქტიკის შესაბამისად, ევროკომისიასთან და ვენეციის კომისიასთან კონსულტაციებით".

მართლმსაჯულებაში რეფორმების აუცილებლობაზე საუბარია ევროკომისიის 9 დათქმაშიც, რაც ჩვენი ევროკავშირში გაწევრიანების საწინდარი უნდა იყოს.

უფრო კონკრეტულად, მეექვსე პუნქტში ვკითხულობთ:

  • "ყოვლისმომცველი და ეფექტური სასამართლო რეფორმის დასრულება და განხორციელება, მათ შორის, იუსტიციის უმაღლესი საბჭოსა და პროკურატურის ყოვლისმომცველი რეფორმა, ვენეციის კომისიის რეკომენდაციების სრულად შესრულება გამჭვირვალე და ინკლუზიური პროცესის გზით".

ამ თემაზე: დაასრულებს თუ არა კეთილსინდისიერების შემოწმება სასამართლო კლანს