მოკლედ: ქართულმა ოცნებამ საქართველოში დასაქმების დეფიციტი შექმნა, — აცხადებს ირაკლი კუპრაძე, პარტია ლელო საქართველოსთვის გენერალური მდივანი.

  • კუპრაძემ, პარტიის ოფისში გამართულ ბრიფინგზე განაცხადა, რომ 2023 წლის ბოლო მონაცემების თანახმად, საქართველოში უმუშევრობის დონე 16.4%-ია; დაუსაქმებელია 261 700 სამუშაოს მაძიებელი.
  • "ეს ტოტალურ უმუშევრობას ნიშნავს!", — აცხადებს ის.

  • ლელოს გენერალური მდივნის თქმით, ქართული ოცნება არაფერს აკეთებს ქვეყანაში სამუშაო ადგილების შესაქმნელად, მოქალაქეებს ქვეყნის დატოვებისკენ უბიძგებს და საზღვრებს გარეთ აიძულებს სამუშაო ადგილების ძებნას.

  • კუპრაძემ, უმუშევრობის პრობლემასთან დაკავშირებით, ასევე, ისაუბრა ევროპული ქვეყნების მონაცემებზე და შედარებისთვის თქვა, რომ საქართველოში უმუშევრობის დონე თითქმის 3-ჯერ მეტია, ვიდრე — ევროპაში.

დეტალები: მისი შეფასებით, "ევროპულ ქვეყნებთან შედარებით, სტატისტიკა საქართველოში კატასტროფულია.

  • კუპრაძემ ისაუბრა ევროსტატის 2023 წლის მონაცემებზე, რომლის თანახმად, ევროკავშირში 2023 წელს უმუშევრობის დონე 5.9% იყო, საქართველოში კი — 16,4%.
  • მისი თქმით, იმავე წელს, აღმოსავლეთ ევროპის სხვადასხვა ქვეყნებში, მაგალითად, რუმინეთში, უმუშევრობის დონე 5.4% იყო, ბულგარეთში — 4.3%, ესტონეთში — 6.4%, ლიეტუვაში — 6.3% და ლატვიაში — 6.5%.

ირაკლი კუპრაძე: "ქართული ოცნების პირობებში ბიუროკრატია იზრდება, რასაც მმართველი პარტია საარჩევნო მანიპულაციებისთვის და ხმების მოსყიდვისთვის იყენებს.

  • სამაგიეროდ, კერძო სექტორში სამუშაო ადგილები არ იქმნება და კატასტროფულად მცირდება.
  • ოცნების ხელისუფლებაში ყოფნის პერიოდში კერძო სექტორში ყველაზე მეტი, 1 022 600 ადამიანი 2016 წელს იყო დასაქმებული, მას შემდეგ ქრონიკული ვარდნაა და კერძო სექტორში დასაქმებულთა რაოდენობა მცირდება; 2022 წელს ეს რიცხვი 975 700-მდე შემცირდა."

"სახელფასო დეფიციტი": ასევე, ირაკლი კუპრაძე აცხადებს, რომ ქართულმა ოცნებამ არა მხოლოდ "დასაქმების დეფიციტი", არამედ "ხელფასების დეფიციტიც" წარმოქმნა და აღნიშნავს, რომ:

  • საქართველოში საშუალო თვიური ხელფასი (545 დოლარი) არა მხოლოდ ბევრად დაბალია ევროკავშირის ყველა ქვეყანაში არსებულ მაჩვენებლებზე, არამედ 22%-ით უფრო დაბალია, ვიდრე თურქეთში, სადაც საშუალო ხელფასია 667 დოლარი.
  • ასევე, ბულგარეთში საშუალო ხელფასი არის 933 დოლარი — 71 %-ით მეტი, ვიდრე საქართველოში;
  • რუმინეთში 1 105 დოლარია, 103%-ით მეტი, ვიდრე საქართველოში;
  • ლატვიაში 1 261 დოლარია, 131%-ით მეტი, საქართველოსთან შედარებით,
  • ხოლო ლიეტუვაში 1 410 დოლარი, რაც 159 %-ით მეტია, ვიდრე ჩვენთან.