მოკლედ: საქართველოს მთავრობა გამოთქვამს "ღრმა წუხილსა და შეშფოთებას" იმ დამოკიდებულების გამო, რასაც უკრაინის ხელისუფლება საქართველოსა და ხალხის მიმართ ავლენს.

• მთავრობა გულისხმობს ზურაბ ადეიშვილის ყოფნას უკრაინის ოფიციალურ დელეგაციაში, რომელიც ბერლინსა და ბრიუსელში ჩავიდა.

დეტალები: განცხადებაში აღნიშნულია, რომ რადგან უკრაინა ომშია ჩართული, "უკრაინის ხელისუფლების ამ დამოკიდებულების შესახებ პოზიციის დაფიქსირებისგან დიდი ხნის განმავლობაში იკავებდნენ თავს".

• თუმცა, ბრიუსელსა და ბერლინში უკრაინული დელეგაციის შემადგენლობაში ზურაბ ადეიშვილის ვიზიტის შემდეგ, გადაწყვიტეს, "პოზიცია მკაფიოდ გამოეხატათ".

მთავრობა აღნიშნავს, რომ გასული 2 წლის განმავლობაში საქართველო უცხადებდა სოლიდარობას უკრაინას და მის ხალხს და დღემდე უწევს ჰუმანიტარულ დახმარებას.

• ამის ფონზე კი, როგორც განცხადებაში წერია, უკრაინამ 2022 წლის 1 მარტს გაიწვია ელჩი, "სანქციების არდაწესების და უკრაინაში მოხალისეების გაგზავნაზე უარის გამო".
• ასევე, მიხეილ სააკაშვილის "მომაკვდავ მდგომარეობაში ყოფნის ყალბი საბაბით", 2023 წლის 3 ივლისს უკრაინა დაატოვებინა საქართველოს საგანგებო და სრულუფლებიან ელჩს უკრაინაში.
• ამას გარდა, მთავრობა წერს, რომ უკრაინის ხელისუფლებაში დღემდე მაღალ თანამდებობებს ინარჩუნებენ პირები, რომლებზეც გამოცხადებულია ძებნა, ან რომლებსაც შეფარდებული აქვთ სასჯელი სხვადასხვა დანაშაულისთვის.
• "ამ თვალსაზრისით, განსაკუთრებით შემაშფოთებელია უკრაინის გენერალური პროკურორის მრჩევლის თანამდებობაზე ზურაბ ადეიშვილისა და უკრაინის კონტრდაზვერვის სამსახურის უფროსის მოადგილის თანამდებობაზე გიორგი ლორთქიფანიძის ყოფნა", — აღნიშნულია განცხადებაში.

მთავრობის მიხედვით:

• ზურაბ ადეიშვილი მსჯავრდადებულია ღვინის ქარხნის უკანონო ჩამორთმევის, ტელეკომპანია იბერიას ხელში ჩაგდების, კობა დავითაშვილის გატაცებისა და მასზე ძალადობის, პატიმრების წამების და ქართუ ბანკის გაკოტრების საქმეებზე, ხოლო ბრალდებულია ტელეკომპანია იმედის დარბევისა და მიტაცების, 2007 წლის 7 ნოემბრის ძალადობის და ბუტა რობაქიძის მკვლელობის დანაშაულის დაფარვის საქმეებზე.
• გიორგი ლორთქიფანიძე ბრალდებულია 2011 წლის 26 მაისის ძალადობის და საზღვრის უკანონო კვეთაში მიხეილ სააკაშვილის დახმარების საქმეებზე.

"მიუხედავად იმისა, რომ საქართველოს პროკურატურამ უკრაინულ მხარეს არაერთგზის მიმართა ამ პირების გადაცემის შესახებ, უკრაინის ხელისუფლებამ არ გამოავლინა აუცილებელი პატივისცემა საქართველოს სახელმწიფოს მიმართ და საქართველოს დამნაშავეები არ გადასცა", — წერია განცხადებაში.

• საქართველოს მთავრობა აღნიშნავს, რომ ურთიერთობების მოსაწესრიგებლად, მნიშვნელოვანი და აუცილებელია, "უკრაინის ხელისუფლებამ საქართველოს გადასცეს დამნაშავეები, რომლებიც დღეს უკრაინის ხელისუფლებაში მაღალ თანამდებობებს იკავებენ."

ბოლო ხაზი: 23 თებერვალს, უკრაინის პროკურატურამ გაავრცელა ფოტო, სადაც ზურაბ ადეიშვილიც ჩანს.

შეხვედრა ბერლინში შედგა, იუსტიციის მინისტრსა და უკრაინის გენერალურ პროკურორს შორის.

ადეიშვილი ესწრებოდა 6 მარტს, ბრიუსელში გამართულ შეხვედრებსაც.