საქართველოს პრემიერმინისტრმა, გიორგი კვირიკაშვილმა, ენგურჰესის თაღოვან კაშხალზე პროექტის პრეზენტაციისას განაცხადა, რომ კაშხლის მიმდებარე ტერიტორია, დაახლოებით 6 წელიწადში, ტურისტულ ზონად იქცევა.

კვირიკაშვილის თქმით, მსოფლიო დონის ატრაქციის პროექტის კონცეფციის შემუშავება დაახლოებით ერთ წელს გაგრძელდება, შემდეგ კი 5-წლიანი სამშენებლო სამუშაოები დაიწყება.

კონცეფციის მიხედვით, ენგურჰესის კაშხლის ტურისტული ინფრასტრუქტურა მოიცავს გადასახედ მოედნებს, საბაგირო გზას, სამეცნიერო და აღმოჩენათა ცენტრს და მუზეუმებს, ღია საკონცერტო სივრცეს, სანაოსნო ინფრასტრუქტურას, მსოფლიოში არსებულ ყველაზე მაღალ ლიფტს კაშხალზე [280 მეტრი] და ექსტრემალური კომპონენტების შემცველ რამდენიმე ატრაქციას.

კვირიკაშვილის თქმით, ენგურჰესის თაღოვანი კაშხალი სიდიდით მეორეა და ის კულტურული მემკვიდრეობის ძეგლის სტატუსსაც იმსახურებს.

პრემიერის განცხადებით, სამშენებლო სამუშაოების საინვესტიციო მოცულობა დაახლოებით 50 მილიონ ლარს შეადგენს, რომლის მოსაძიებლად, პოტენციურ ინვესტორებთან მოლაპარაკებები უკვე დაწყებულია.

ტურისტული ზონის პროექტირებისთვის სახელმწიფო ბიუჯეტიდან 2 მილიონ ლარზე მეტი გამოიყო, ერთ წელიწადს გაგრძელდება, რის შემდეგაც თაღოვანი კაშხლის ტერიტორიაზე სამშენებლო-ინფრასტრუქტურული სამუშაოები დაიწყება.

ტურისტული ზონის სამშენებლო-ინფრასტრუქტურული მოწყობის პროცესში 200-მდე ადგილობრივი მცხოვრები დასაქმდება. ინფრასტრუქტურული მოწყობის სამუშაოების შემდეგ კი, დასაქმებულთა რიცხვი 300-მდე გაიზრდება. წინასწარი გათვლებით, ენგურის ტურისტული ზონა წელიწადში 400 000-მდე ტურისტს მოემსახურება.

ენგურჰესის თაღოვან კაშხალს, საქართველოს მთავრობის დადგენილებით, 2015 წლის 4 სექტემბრიდან ეროვნული კატეგორიის ძეგლის სტატუსი აქვს მინიჭებული.