რა ხდება: რუსეთის ფედერაციის შეიარაღებული ძალების მიერ ოკუპირებული აფხაზეთის ე.წ. პრეზიდენტი, ასლან ბჟანია, რუსეთშია. ის რუსეთის საგარეო საქმეთა მინისტრს, სერგეი ლავროვს შეხვდა. ბჟანიას პრესსამსახური აცხადებს, რომ ამ შეხვედრისას ლავროვთან სოხუმისა და მოსკოვის ურთიერთობების განვითარება განიხილეს.

დეტალები: თვითგამოცხადებული რესპუბლიკის პრესსამსახურის განცხადებით, ბჟანიამ დიპლომატის დღე მიულოცა ლავროვს და უსურვა წარმატებები "რუსული სახელმწიფოს საკეთილდღეო საქმეებში."

  • ასლან ბჟანია პუტინის ადმინისტრაციის უფროსის მოადგილეს, დიმიტრი კოზაკსაც შეხვდა.
  • იმავე შეხვედრაში მონაწილეობა მიიღო რუსეთის ფედერაციის ვიცე-პრემიერმა , ალექსანდრე ნოვაკიმაც.
  • ნოვაკი, 2022 წლის შემდეგ, რუსეთის მიერ ოკუპირებულ სოხუმთან და ცხინვალთან თანამშრომლობის ზედამხედველად არის დანიშნული.

გარდა ამისა, რუსეთში ბჟანია შეხვდა უშიშროების საბჭოს მდივნის პირველ მოადგილეს, ეკონომიკური განვითარების მინისტრს, ცენტრალური საარჩევნო კომისიის თავმჯდომარესა და ფედერალური საგადასახადო სამსახურის ხელმძღვანელსაც.

  • "შეხვედრებზე განიხილეს ორმხრივი თანამშრომლობის საკითხები სოციალურ-ეკონომიკურ, ენერგეტიკულ სფეროში და რიგი სხვა საკითხები, რაზეც ორმხრივი მუშაობა სისტემატურად მიმდინარეობს", — წერია თვითაღიარებული რესპუბლიკის ე.წ. პრეზიდენტის ადმინისტრაციის განცხადებაში.

ბოლო ხაზი: ბჟანიამ, რუსეთში ვიზიტამდე ერთი დღით ადრე შეიტანა აფხაზეთის არაღიარებული რესპუბლიკის ე.წ. პარლამენტში კანონპროექტი არაკომერციული ორგანიზაციებისა და უცხოური აგენტის ფუნქციების შემსრულებელი პირების შესახებ, რაც, არსებითად, უცხოური აგენტების შესახებ რუსული კანონის ანალოგიურია. იმავე კანონპროექტის კანონად მიღება უნდოდა ქართულ ოცნებას გასული წლის მარტში.