მოკლედ: პროკურატურამ, 3 თებერვალს, თაღლითური ქოლ-ცენტრების მოწყობისა და ორგანიზების ბრალდებით, ორგანიზებული დანაშაულებრივი ჯგუფის 7 წევრი დააკავა.

• უწყების ინფორმაციით, ქოლ-ცენტრების და მათი ორგანიზებაში ჩართული ადამიანების გამოვლენის მიზნით, გასული წლის 18 ივლისს და ასევე, მიმდინარე წლის 1 თებერვალს, საქართველოში ფართომასშტაბიანი ღონისძიებები ჩატარდა.

დეტალები: პროკურატურის განცხადების მიხედვით, თბილისში, სხვადასხვა მისამართზე მდებარე ე.წ. თაღლითური ქოლ-ცენტრები, ფიზიკური პირები და მათი ბინები გაჩხრიკეს.

• ამოღებულია ასეულობით ელექტრონული მატარებელი, დოკუმენტაცია და დიდი ოდენობით ფულადი თანხა.
• ათეულობით ობიექტიდან გამოთხოვილია ელექტრონული ინფორმაცია.

რა დაადგინა გამოძიებამ: ორგანიზებული ჯგუფის წევრების საქმიანობა მოიცავდა საქართველოში კომპანიების დაფუძნებას და მათ ბაზაზე, ე.წ. თაღლითური ქოლ-ცენტრების მოწყობასა და ორგანიზებას.

• ჯგუფის წევრები ქმნიდნენ სხვადასხვა საფირმო სახელწოდების ელექტრონულ სავაჭრო პლატფორმებს;
• ვებგვერდების გამოყენებით ახდენდნენ სანდო საინვესტიციო კომპანიების შთაბეჭდილებას და დაზარალებულებს სხვადასხვა სახის სარფიან, ფინანსურ გარიგებებს სთავაზობდნენ.
• შემდგომში კი, დაზარალებულების კუთვნილი დიდი ოდენობით თანხების მოტყუებით ეუფლებოდნენ და ამ თანხას ათეთრებდნენ.
• "აღნიშნული გზით, ორგანიზებული დანაშაულებრივი ჯგუფის წევრები თაღლითურად დაეუფლნენ შვეიცარიის კონფედერაციის მოქალაქეების კუთვნილ რამდენიმე მილიონ შვეიცარიულ ფრანკს. ხოლო შემდგომში, თაღლითურად დაუფლებული თანხებისთვის კანონიერი სახის მისაცემად, მოახდინეს ხსენებული თანხების მათივე კონტროლის ქვეშ არსებულ საბანკო ანგარიშებზე განთავსება და ჩართვა ეკონომიკურ ბრუნვაში, მათ შორის უძრავი ქონებების შეძენის გზით", — ნათქვამია პროკურატურის განცხადებაში.
• ასევე, ცნობილი გახდა, რომ გამოძიებამ ყადაღა დაადო ბრალდებულების საკუთრებაში არსებულ 5 მილიონ ლარამდე ღირებულების უძრავ და მოძრავ ქონებას.
• პროკურატურა გაატარებს პროცედურებს, რომ მფლობელებს ჩამოართვან დანაშაულებრივი წარმომავლობის ქონება.
• დაკავებულებს ბრალდება ორგანიზებული ჯგუფის მიერ ჩადენილ თაღლითობისა და ფულის გათეთრების ფაქტებზე წარედგინათ, რაც სასჯელის სახედ და ზომად 9 დან 12 წლამდე თავისუფლების აღკვეთას ითვალისწინებს.

ბოლო ხაზი: პროკურატურის მიხედვით, ანალოგიურ დანაშაულებზე, ევროპელ კოლეგებთან თანამშრომლობის შედეგად, სისხლისსამართლებრივი დევნა საქართველოს პროკურატურის მიერ, 2021-2024 წლების პერიოდში, დაწყებულია ე.წ. ქოლ-ცენტრების საქმიანობაში ჩართული 72 ფიზიკური და 3 იურიდიული პირის მიმართ.