რა ხდება: სახალხო დამცველმა დააკმაყოფილა ანანია გაჩეჩილაძის მოთხოვნა და დაადგინა შალვა რამიშვილის მიერ მისი სექსუალური შევიწროების ფაქტი ფიზიკურ შეხებასთან და სხეულისა და გარეგნობის თაობაზე გაკეთებულ შეფასებებთან დაკავშირებით.

• ომბუდსმენის აპარატმა შესაბამისი გადაწყვეტილების შესახებ მხარეებს წერილობით აცნობა.
• დადგენილებაში, რომელიც სახალხო დამცველს საჯაროდ არ გამოუქვეყნებია, აღნიშნულია, რომ შალვა რამიშვილმა არ ითანამშრომლა ომბუდსმენის აპარატთან: "საქმის შესწავლის პროცესში, მოპასუხეს [შალვა რამიშვილს] განემარტა მტკიცების ტვირთის სტანდარტი, თუმცა, მოპასუხეს სექსუალური შევიწროების ფაქტის უარყოფის მიზნით, მისი პოზიცია და არგუმენტები არ წარმოუდგენია", — აღნიშნავს სახალხო დამცველი.
• დადგენილებისას, სახალხო დამცველი განმცხადებლის, ანანია გაჩეჩილაძის მიერ წარდგენილ მტკიცებულებებს დაეყრდნო.
• ანანია გაჩეჩილაძის ინტერესებს სახალხო დამცველის აპარატში იცავდა საქართველოს ახალგაზრდა იურისტთა ასოციაცია (საია).
• On.ge-ს ანანია გაჩეჩილაძემ მიაწოდა სახალხო დამცველის დადგენილება.

რატომ არის მნიშვნელოვანი: ომბუდსმენის აპარატი განმარტავს, რომ საქმე პრეცედენტულია, რადგან სახალხო დამცველმა პირველად დაადგინა, სექსიზმი, როგორც სიძულვილის ენის აკრძალვის ერთ-ერთი ფორმა, რაც რეგულირდება კანონით — დისკრიმინაციის ყველა ფორმის აღმოფხვრის შესახებ.

• სახალხო დამცველის განმარტებით, სექსიზმი სქესისა თუ გენდერის ნიშნით დისკრიმინაციის წახალისების სახედ მიიჩნევა.

რა გვახსოვს ამ საქმის თაობაზე: 2018 წელს ანანია გაჩეჩილაძეს დაუკავშირდა Pos TV-ის დირექტორი, შალვა რამიშვილი და ინტერვიუს მომზადება შესთავაზა.

• ინტერვიუსთან დაკავშირებით, შეხვედრა რამდენიმე დღეში შედგა.
• შეხვედრის განმავლობაში, ნაცვლად ინტერვიუსთან დაკავშირებული დეტალებისა, შალვა რამიშვილი ანანია გაჩეჩილაძეს უსვამდა პირადი ხასიათის შეკითხვებს, აფასებდა მის გარეგნობას უარყოფით თუ სექსუალურ კონტექსტში, აგრეთვე ადგილი ჰქონდა არასასურველ სექსუალური ხასიათის ფიზიკურ შეხებას.

არქივიდან: შალვა რამიშვილს სექსუალურ შევიწროებაში ანანია გაჩეჩილაძეც ამხელს და ჩანაწერს აქვეყნებს

მნიშვნელოვანია, რომ მათი შეხვედრისას უკვე არსებობდა 2016 წლის სასამართლო გადაწყვეტილება შალვა რამიშვილის წინააღმდეგ, როდესაც თათია სამხარაძემ სექსუალურ შევიწროებაში ამხილა და დავაც მოუგო.

• 2018 წლის 3 იანვარს მას სექსუალური შევიწროების საქმეზე საქალაქო სასამართლომ მორალური ზიანის ასანაზღაურებლად 2 000-ლარიანი ჯარიმა დააკისრა, რაც სააპელაციომ ძალაში დატოვა.
• ამის გათვალისწინებით, ანანია გაჩეჩილაძემ 2023 წლის მარტში თქვა, რომ შალვა რამიშვილთან კაბინეტში შესვლამდე ხმის ჩამწერი ჩართო.
• სახალხო დამცველის დასკვნა სწორედ ამ მტკიცებულებას ეყრდნობა.

სახალხო დამცველის განმარტებით, ადამიანისთვის რამდენჯერმე იმის მითითება, რომ მას მამაკაცის საწყისი აქვს, ქალის ფორმების მიუხედავად, არის სექსისტური შინაარსის და მოპასუხისთვის განჭვრეტადი უნდა ყოფილიყო, რომ მისი შეფასებები ადრესატისთვის არასასურველი იქნებოდა. განმცხადებლის კრიტიკა იმის გამო, მისი გარეგნობა არ შეესაბამება მოპასუხის სექსუალობის შესახებ მის წარმოდგენებს, წარმოადგენს სქესის ნიშნით ადამიანის შერცხვენას და ცალსახად სექსისტურია.

არქივიდან: კიდევ 3 ქალი შალვა რამიშვილს სექსუალურ შევიწროებაში ამხელს