მსოფლიო ტურნეს დასრულების შემდეგ, ჯასტინ ტიმბერლეიკმა გაამხილა, რომ მთელი ტურის განმავლობაში მას ლაიმის დაავადება აწუხებდა. ამერიკელმა მომღერალმა სულ ახლახან ინსტაგრამზე ვრცელი პოსტი გამოაქვეყნა, სადაც დეტალურად აღწერა თავისი დიაგნოზი.

გულშემატკივრებმა ცოტა ხნის წინ შენიშნეს, რომ მუსიკოსი კონცერტებზე მოდუნებული და უენერგიო იყო, რაც, პოპვარსკვლავის თქმით, ლაიმის დაავადებით გამოწვეული ნერვების დაზიანებისა და დაღლილობის შედეგია.

ლაიმის დაავადება ბაქტერიული ინფექციაა, რომელიც ადამიანებზე ტკიპებიდან გადადის. უახლესი კვლევით ცნობილი ხდება, რომ ეს დაავადება მსოფლიოში სულ უფრო მეტად ვრცელდება, ამის სავარაუდო მიზეზი კი კლიმატის ცვლილებაა. 2022 წელს გამოქვეყნებული კვლევის მიხედვით, ლაიმის დაავადება 7-დან 1 ადამიანს აქვს.

"სხვა რაღაცებთან ერთად, ჯანმრთელობის პრობლემებთან გამკლავება მიწევდა: ლაიმის დაავადება დამიდგინეს. ამას იმიტომ კი არ ვამბობ, რომ შეგებრალოთ, უბრალოდ, მინდა, ნათელი მოვფინო, სცენის მიღმა რა ბრძოლა მქონდა", — წერს ტიმბერლეიკი — "თუ თქვენ გაქვთ ეს დაავადება ან იცნობთ ვინმეს, ვისაც ჰქონდა, მაშინ გეცოდინებათ, რომ მასთან ერთად ცხოვრება ძალიან გასუსტებს, როგორც ფსიქიკურად, ისე ფიზიკურად".

მუსიკოსი ამბობს, რომ დიაგნოზის გაგების შემდეგ ტურნეს შეწყვეტაზეც ფიქრობდა, მაგრამ საბოლოოდ გადაწყვიტა, გულშემატკივრები არ გაეწბილებინა.

"რთული გადაწყვეტილების წინაშე დავდექი: შემეწყვიტა ტურნე თუ არა? საბოლოოდ, გადავწყვიტე, რომ კონცერტზე გამოსვლით განცდილი სიხარული გაცილებით აღემატება ჩემი სხეულის წუთიერ სტრესს. და ძალიან მიხარია, რომ არ შევწყვიტე", — წერს ტიმბერლეიკი, — "ამ ყველაფერს იმ იმედით გიზიარებთ, რომ დაავადების მქონე ყველა ადამიანი ერთმანეთს დავეხმარებით და გვერდში დავუდგებით. მსურს, ჩემი წვლილი შევიტანო და სხვებსაც დავეხმარო".

შეგახსენებთ, რომ ტიმბერლეიკმა მსოფლიო ტურნე 30 ივლისს, სტამბოლში გამართული კონცერტით დაასრულა. ტურნეს განმავლობაში, პოპვარსკვლავმა 121 კონცერტი გამართა აშშ-ში, კანადაში, მექსიკაში, სამხრეთ ამერიკისა და ევროპის ქვეყნებში, მათ შორის, საქართველოში.

ტიმბერლეიკი თბილისს 23 ივლისს ეწვია ქართული ოცნების ხელისუფლების მხარდაჭერილი პროექტის, Starring Georgia-ის, ფარგლებში. საქართველოში მის კონცერტს დიდი და არაერთგვაროვანი გამოხმაურება მოჰყვა, განსაკუთრებით მას შემდეგ, რაც ინტერნეტში გავრცელდა ვიდეო, სადაც მუსიკოსი გულშემატკივრის მიერ სცენაზე დადებულ საქართველოს დროშას ხელში არ იღებს და, თითქოს, აბიჯებს.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...