თბილისის საქალაქო სასამართლოს მოსამართლემ, ნინო გალუსტაშვილმა პროევროპულ აქციებში მონაწილეობისთვის დაკავებული 11 პირი კვლავ პატიმრობაში დატოვა.

სასამართლოს დღევანდელ სხდომაზე ადვოკატებმა სათითაოდ დააყენეს პატიმრობის გაუქმების ან გირაოთი შეცვლის შუამდგომლობა, მხოლოდ მსახიობ ანდრო ჭიჭინაძის ადვოკატმა დააყენა გირაოს გარეშეც პატიმრობის გაუქმების შუამდგომლობა და მოითხოვა, რომ ანდრო ჭიჭინაძეს ბრალდებულის სკამი გირაოს გარეშე დაეტოვებინა.

ადვოკატები ამტკიცებდნენ, რომ საქმეში არანაირი პირდაპირი მტკიცებულება არაა, რითაც პარლამენტთან მიმდინარე აქციის დროს ბრალდებულთა ჯგუფურ ძალადობაში მონაწილეობა იკვეთება. მათივე თქმით, საქმის მთავარი გამომძიებლის, არსენ ხუნაშვილის ჩვენებაც მთავარი მტკიცებულებაა იმისა, რომ არცერთ ბრალდებულს პირდაპირი კავშირი ორგანიზატორებთან არ უდგინდება და რომ ზოგადად ბრალდებულებს შორის არანაირი კავშირი არ ვლინდება.

შუამდგომლობების მოსმენის შემდეგ მოსამართლე ნინო გალუსტაშვილმა ნახევარ საათიანი შესვენება გამოაცხადა. სხდომის განახლების შემდგომ მან გადაწყვეტილება გამოაცხადა და თქვა, რომ თერთმეტივე პირი კვლავ პატიმრობაში რჩება.

"მაინც მოვიგებთ ბოლოს, ხო იცით ბიჭებო", — დარბაზიდან ამ შეძახილით გააცილეს ბრალდებულები, რომლებიც საბადრაგო სამსახურის თანამშრომლებმა გაიყვანეს.