პალესტინური მხარის ინფორმაციით, ჩრდილოეთ ღაზაში, საკვების რიგში მდგომთაგან 50-ზე მეტი ადამიანი დაიღუპა და 400-მდე დაშავდა. ინციდენტი ზიქიმის გამშვები პუნქტის მახლობლად მოხდა. ინფორმაციას ამის შესახებ BBC ალ-შიფას საავადმყოფოზე დაყრდნობით ავრცელებს.

ღაზას ჰამასის მიერ კონტროლირებადი სამოქალაქო თავდაცვის სააგენტო ამტკიცებს, რომ ისრაელის ჯარებმა ცეცხლი იმ ხალხს გაუხსნეს, რომლებიც ჰუმანიტარული დახმარების სატვირთოებთან იყვნენ შეკრებილი. ისრაელის სამხედრო ძალებმა კი განაცხადეს, რომ მხოლოდ გამაფრთხილებელი გასროლები განახორციელეს და დაშავებულების შესახებ არანაირი ინფორმაცია არ აქვთ.

ღაზას ჰამასის მიერ კონტროლირებულმა ჯანმრთელობის სამინისტრომ განაცხადა, რომ შიმშილით გამოწვეული კიდევ შვიდი სიკვდილი დაფიქსირდა, რაც ომის დაწყების შემდეგ 154-ს შეადგენს.

ეს იმ ფონზე ხდება, როცა ერთი დღით ადრე, გაეროს მხარდაჭერით მომუშავე გლობალურმა კვების უსაფრთხოების ექსპერტებმა განაცხადეს, რომ ღაზაში "შიმშილის ყველაზე უარესი სცენარი უკვე რეალობად იქცა" და ეს პროცესი 2.1 მილიონიან მოსახლეობაში მიმდინარეობს.

გაეროს სააგენტოებმა ასევე განაცხადეს, რომ ღაზაში ადამიანის მიერ ხელოვნურად გამოწვეული მასობრივი შიმშილია და პასუხისმგებლობას ისრაელს აკისრებენ, რომელიც ღაზაში ჰუმანიტარული ტვირთების შეტანას აკონტროლებს. ისრაელის ხელისუფლება კი ამ ბრალდებებს უარყოფს და აცხადებს, რომ დახმარებაზე შეზღუდვები არ არსებობს და შიმშილის პრობლემა არ არის.