შინაგან საქმეთა სამინისტროს განცხადებით, ქართული ოცნების ყოფილ დეპუტატს, ლუკა კურტანიძეს 2 წლამდე პატიმრობა ემუქრება.

ყოფილი ჭიდაობის ფედერაციის პრეზიდენტი და ოცნების დეპუტატი ლუკა კურტანიძე ყოფილ მეუღლეს, ხათუნა მიქაცაძეს ფიზიკურად გაუსწორდა. შემთხვევა ქობულეთში, მიქაცაძის სახლში მოხდა, სადაც ლუკა კურტანიძე სახლში ძალის გამოყენებით შევიდა. ლუკა კურტანიძეს შემაკავებელი ორდერი აქვს გამოწერილი.

მას შემდეგ, რაც ლუკა კურტანიძეს ყოფილმა მეუღლემ, ხათუნა მიქაცაძემ მასზე თავდასხმის ვიდეო "ტვ პირველს" მიაწოდა, პოლიციამ ყოფილი "ქართული ოცნების" დეპუტატი დააკავა. NEWS.On.ge-ს შსს-მ განუცხადა, რომ კურტანიძე დაკავებულია სისხლის სამართლის კოდექსის 126-ე პრიმა და 381-ე პრიმა მუხლებით, რაც ოჯახში ძალადობას და დამცავი ორდერით გათვალისწინებული მოთხოვნების, ვალდებულებების შეუსრულებლობას გულისხმობს.

მიქაცაძე "ტვ პირველს" სასწრაფო დახმარების მანქანიდან უყვება, რომ პოლიციამ თავიდანვე არ დააკავა კურტანიძე და აქეთ განარიდეს საკუთარი სახლიდან. ვიდეოში გვესმის, თუ როგორ მიმართავს მიქაცაძე პოლიციის ეკიპაჟს არ წაშალოს ვიდეო მასალა. ხათუნა მიქაცაძეს თავდასხმისგან ტვინის შერყევა აქვს მიღებული და მთელ სხეულზე ფიზიკური დაზიანებები აღენიშნება.

"ეს არ არის არც მეორე, არც მესამე, არც მეოთხე და მეხუთე შემთხვევა. ყველა ჯერზე, როდესაც მივმართე პოლიციას, მეუბნებოდნენ, რომ იმიტომ, რომ ელდარ კურტანიძეა, მოდი, ნუ გავწირავთ და მოდი, შემოვიფარგლოთ ფსიქოლოგიური ძალადობით. იმედს ვიტოვებ, რომ ახლა, ამ პროცესში, როცა პოლიციის თანამშრომლები დაესწრნენ ამ ფიზიკურ ძალადობას, ფსიქოლოგიურ ძალადობას ვეღარ იტყვიან.

ელდარ კურტანიძეს მოახლოება აქვს სასამართლო გადაწყვეტილებით აკრძალული, შემაკავებელი ორდერია 9 თვიანი მის მიმართ გამოცემული, მოახლოება აქვს აკრძალული. მისამართი ვუთხარი საპატრულო ეკიპაჟს, სად იდგა ელდარ კურტანიძის მანქანა და ნაცვლად იმისა, რომ იქ მისულიყო, მოვიდნენ და "წამობრძანდით, უნდა გამოგკითხოთო". ეს ადამიანი იმუქრება, რომ "მე ვარ მთავრობა, მე ვარ სახელმწიფო და შენ სახელმწიფოს უპირისპირდებიო," — თქვა ხათუნა მიქაცაძემ.