მოკლედ: კორუფციის აღქმის ინდექსის (CPI) მიხედვით, საქართველოს 2023 წელს 53 ქულა აქვს, რაც წინა წელთან შედარებით 3 ქულით ნაკლებია.

რატომ არის ეს მნიშვნელოვანი: კორუფციის აღქმის ინდექსი მსოფლიოში ყველაზე ფართოდ გამოყენებული კორუფციის გლობალური რეიტინგია. ის ზომავს თითოეული ქვეყნის საჯარო სექტორის კორუმპირებულობის დონეს ავტორიტეტული საერთაშორისო ორგანიზაციების კვლევების საფუძველზე, რომელთაგან თითოეული სხვადასხვა ქვეყანაში კორუფციის მხრივ არსებული მდგომარეობის შეფასებას შეიცავს.

დეტალები: კორუფციის აღქმის ინდექსი 180 ქვეყანაში ტარდება. ქვეყნები ფასდება 100 ბალიანი სისტემით, სადაც 100 დადებითი, ხოლო 0 უარყოფითი შედეგია.

  • საერთაშორისო გამჭვირვალობა-საქართველოს (TI) აღნიშნავს, რომ საქართველოს ასეთი დაბალი ქულა 2015 წლის შემდეგ არ ჰქონია.

ფოტო: საერთაშორისო გამჭვირვალობა

"აღსანიშნავია ინდექსში საქართველოს მიერ მიღებული ქულის თანმდევი ანალიზიც, რომლის მიხედვითაც ქვეყანაში იზრდება მაღალი დონის კორუფცია და ღრმავდება სახელმწიფო ინსტიტუციების მიტაცება", — წერს TI.

  • როგორც ორგანიზაცია აღნიშნავს, საქართველოში კორუფცია კვლავ პრობლემად რჩევა, მათი თქმით, ეს ფაქტი უფრო ღრმა სისტემურ პრობლემებზე მიუთითებს, კონკრეტულად "ძალაუფლების კონცენტრაციაზე და ელიტების მკაფიო გავლენაზე სახელმწიფო ინსტიტუციებსა და გადაწყვეტილების მიღებაზე".

TI-ის რეკომენდაციები: TI მიიჩნევს, რომ საქართველოში ანტიკორუფციული ბიუროს დამოუკიდებლობა უზრუნველყოფილი უნდა იყოს. "ის უნდა აღიჭურვოს გამოძიების უფლებით და შეიცვალოს მისი უფროსის არჩევის წესი, რათა პრემიერ-მინისტრის ნაცვლად, ის დანიშნოს პარლამენტმა ოპოზიციის ჩართულობით".

  • უნდა შეიცვალოს გენერალური პროკურორის დანიშვნის წესი, რათა პროკურატურა გათავისუფლდეს პოლიტიკური გავლენისგან;
  • უნდა გატარდეს რეალური დეოლიგარქიზაცია და საჯარო დაწესებულებები გათავისუფლდეს ოლიგარქიული გავლენისგან;
  • ხელი შეეწყოს სამოქალაქო საზოგადოებისა და საგამოძიებო მედიის მუშაობას, როგორც ძლიერი ანტიკორუფციული სისტემის განუყოფელ ნაწილს.

მსგავსი: TI-ის შეფასებით, საქართველოში მაღალი დონის კორუფცია კლეპტოკრატიის სახეს იღებს