მოკლედ: რუს ქალს, დარია ტრეპოვას გასული წლის აპრილში, ომის მომხრე ბლოგერის, ვლადლენ ტატარსკის მკვლელობისთვის 27 წელი მიესაჯა.

  • ტატარსკი დაიღუპა ბომბის აფეთქების შემდეგ, რომელიც ჩამონტაჟებული იყო ტრეპოვას მიერ ნაჩუქარ ქანდაკებაში.
  • სასჯელის ეს ვადა არის ერთ-ერთი ყველაზე ხანგრძლივი, რაც კი რუსეთში ქალისთვის მიუსჯიათ.

დეტალები: აფეთქება მაშინ მოხდა, როდესაც ტატარსკი პეტერბურგში ხალხის წინაშე სიტყვით უნდა გამოსულიყო.

  • შემთხვევის შედეგად დაზიანება მიიღო ათობით ადამიანმა.
  • 26 წლის ტრეპოვა ბრალდებას უარყოფს. მისი თქმით, ის ფიქრობდა, რომ ქანდაკებაში მოსასმენი მოწყობილობა იყო.
  • ტრეპოვას განმარტებით, უკრაინელების ბრძანებით მოქმედებდა და ბომბის შესახებ ინფორმაცია არ ჰქონდა.

რა ვერსიას უყვება სასამართლოს ბრალდებული: ტრეპოვამ სასამართლოში განაცხადა, რომ ის ასრულებდა უკრაინაში მყოფი კაცის დავალებებს, რომელსაც იცნობდა სახელით გეშტალტი (გერმანულად — ფორმა). მისი ვინაობა ცნობილი არ არის.

  • ბრალდებული მას უკრაინაში მცხოვრები ჟურნალისტის, რომან პოპკოვის საშუალებით დაუკავშირდა. ტრეპოვა ომის მოწინააღმდეგეა და სურდა, წასულიყო უკრაინაში და ემუშავა ჟურნალისტად.
  • ქალის თქმით, გეშტალტის მითითებებით, მან ტატარსკის ნდობა მოიპოვა, მას გაეცნო როგორც ხელოვნებათმცოდნეობის სტუდენტი და ესწრებოდა მის გამოსვლებს.
  • მარტში მას გეშტალტმა გაუგზავნა ქანდაკება და დაარწმუნა, რომ მასში მოსასმენი მოწყობილობა იყო დამონტაჟებული.
  • "მე ვგრძნობ დიდ ტკივილს და სირცხვილს, რომ ჩემმა გულუბრყვილობამ გამოიწვია ასეთი კატასტროფული შედეგები. მე არ მინდოდა ვინმესთვის ზიანი მიმეყენებინა", - განუცხადა ტრეპოვამ სასამართლოს.

ვინ იყო ვლადლენ ტატარსკი: ცნობილი ბლოგერი, რომელსაც ჰყავდა ნახევარ მილიონზე მეტი გამომწერი და ჰქონდა კრიმინალური წარსული.

  • ის უკრაინაში, დონეცკის რეგიონში დაიბადა. ტატარსკი შეიარაღებული ძარცვისთვის გაასამართლეს და პატიმრობა მიუსაჯეს, ციხიდან გამოსვლის შემდეგ კი თქვა, რომ რუსეთის მიერ მხარდაჭერილ სეპარატისტებს შეუერთდა.
  • ვლადლენ ტატარსკი კრემლის მხარდამჭერი სამხედრო ბლოგერი იყო. გარდაცვალების შემდეგ ის პუტინმა მამაცობის ორდენით დააჯილდოვა.

ბოლო ხაზი: რუსი გამომძიებლების განცხადებას, რომ თავდასხმის უკან კიევი იდგა, უკრაინის ოფიციალური პირები არც ადასტურებენ და არც უარყოფენ.