მოკლედ: 2027 წლიდან, შესაძლოა, აბიტურიენტებს უნივერსიტეტში მოსახვედრად ერთიანი ეროვნული გამოცდების გარდა, სახელმწიფო გამოცდის ჩაბარებაც მოუწიოთ.

  • ამის შესახებ გია მურღულიამ, განათლების, მეცნიერებისა და ახალგაზრდობის მინისტრის კონსულტანტმა, ინტერპრესნიუსთან ისაუბრა.

რა არის სახელმწიფო გამოცდა: მურღულიას თქმით, სახელმწიფო გამოცდის დანერგვა ჯერ იდეის დონეზე განიხილება, თუმცა, დანერგვის შემთხვევაში, სახელმწიფო გამოცდა სკოლასტიკური უნარების ტესტის (SAT) მსგავსი იქნება.

რას ნიშნავს SAT: არის სტანდარტული მისაღები გამოცდა, რომელსაც სკოლის დამთავრების შემდეგ უმაღლეს სასწავლებლებში ჩასაბარებლად ტარდება. ეს პრაქტიკა ძირითადად ამერიკაშია დამკვიდრებული, თუმცა, ვხვდებით ევროპის რამდენიმე ქვეყანაშიც. SAT ტესტი სკოლაში მიღებულ ცოდნას — კითხვის, წერის და მათემატიკურ პრობლემებზე მუშაობის უნარს ამოწმებს. ასევე, ადგენს შენს უნარებს, რამდენად შეძლებ უნივერისტეტში წარმატების მიღწევას.

  • მურღულია აღნიშნავს, რომ უმაღლესი განათლების სისტემაში ჩარიცხვა უნდა იყოს დაკავშირებული რამდენიმე კომპონენტთან, კონკრეტულად "რა სოციალურ და საგანმანათლებლო პროექტებში მიგიღია მონაწილეობა, რა ინტერესები გქონდათ სკოლაში, როგორი იყო სკოლის ზოგადი ნიშნები".

"თუ დღეს მოსწავლე სწავლის გაგრძელებას დასავლურ უნივერსიტეტში გადაწყვეტს, იქ აუცილებლად მოსთხოვენ სკოლაში ბოლო ოთხი წლის შედეგებს — მე-9 და მე-12 კლასის ქულებს. ჩვენთან უმაღლეს სასწავლებელს ნაკლებად (ან - საერთოდ არ) აინტერესებს სკოლაში რა გააკეთე", — ამბობს მურღულია ინტერპრესნიუსთან.

დეტალები: მურღულია ინტერპრესნიუსთან აღნიშნავს, რომ ეროვნული გამოცდების ფორმატი, შესაძლოა, შეიცვალოს, თუმცა, როგორ, ჯერ არ იცის.

  • ეროვნულ გამოცდებს ისევ შეფასებისა და გამოცდების ეროვნული ცენტრი (NAEC) ჩაატარებს. "ოღონდ ეს არ იქნება ე.წ. CAT-ის ტიპის გამოცდა. იქნება ეს ყველა საგანში თუ როგორ, ამაზე პასუხებს, ალბათ, მალევე შევიტყობთ", — ამბობს მურღულია.

გია მურღულიამ ასევე აღნიშნა, რომ სკოლაში, შესაძლოა, ჰაგიოგრაფიული ნაწარმოებების სწავლებას ნაკლები დრო დაეთმოს და მეტი ყურადღება თანამედროვე ლიტერატურაზე გამახვილდეს. ასევე, მისი თქმით, სკოლებში ბიბლიისა და მითოსის ნაწილობრივ სწავლებაც განიხილება.

  • "ამ წუთას სკოლაში სამ ჰაგიოგრაფიულ ტექსტს ვასწავლით, სამივე ძალიან მეძვირფასება, მაგრამ როგორც კი ვამბობთ რომ რამე შევცვალოთ, იწყება საუბარი რომ წარსულს პატივს არ ვცემთ. სკოლაში ყველაფერი კი არ უნდა ასწავლო, უნდა ასწავლო იმდენი, რაც ბავშვის განვითარებისთვისაა საჭირო", — ამბობს გია მურღულია.