მოკლედ: დემოკრატიის კვლევის ინსტიტუტი (DRI) ეხმიანება სასამართლოს გადაწყვეტილებას, რომლის მიხედვით, 23 იანვარს კეკელიძეზე, ხატიაშვილების ოჯახის მხარდამჭერ აქციაზე დაკავებულ ორ პირს 2-ათას ლარიანი ჯარიმა შეეფარდა.

DRI მიიჩნევს, რომ სასამართლო პროცესი ფორმალურად გაიმართა, მოსამართლემ კი საქმესთან დაკავშირებული გარემოებები ობიექტურად არ შეაფასა, ჯარიმა დაკავებულებს მხოლოდ პოლიციის ჩვენების საფუძველზე შეუფარდა.

  • საუბარია ოლღა ჭელიძესა და ნონა ღურჭუმელიძეზე, რომლებიც პოლიციამ ადმინისტრაციული წესით დააკავა.
  • მათთან ერთად, ადმინისტრაციული წესით დააკავეს კიდევ 16 პირი, ორს კი — სისხლის სამართლის დანაშაულში ედება ბრალი.

დეტალები: DRI-ის დამკვირვებლები სასამართლო პროცესს ესწრებოდნენ.

DRI მიიჩნევს, რომ შსს-ს მიერ წარმოდგენილი მტკიცებულებები ვერ ადასტურებდნენ ჭელიძის და ღურჭუმელიძის მიერ ადმინისტრაციულ სამართალდარღვევას.

ჯარიმის გადაწყვეტილება კი მოსამართლე ირაკლი ჩიკაშუამ მხოლოდ იმ პოლიციელების ჩვენების საფუძველზე მიიღო, რომლებიც დაკავებაში უშუალოდ მონაწილეობდნენ.

ეს პოლიციელები პროცესზე მოწმის სახით გამოცხადდნენ.

DRI-ის მიხედვით, დაკავებულმა ითხოვა პროცესის გადადება, რათა დამატებითი მტკიცებულებების წარდგენის საშუალება ჰქონოდა.

ეს შუამდგომლობა სასამართლომ არ გაიზიარა, რაც, DRI-ის შეფასებით, სასამართლოს საქმისადმი ზედაპირულ დამოკიდებულებაზე მიანიშნებს.

  • DRI-ის თქმით, პრობლემური იყო დაკავების ოქმის შინაარსიც — მხარემ სასამართლო პროცესზე წარმოადგინა დაკავებული პირისთვის ჩაბარებული ოქმი, რომელშიც, "შსს-ს მიერ პროცესზე წარმოდგენილი ოქმისაგან განსხვავებით, დაკავების საფუძვლად პოლიციელისთვის სიტყვიერი შეურაცხყოფის მიყენება მითითებული არ იყო".
  • "დაკავების ოქმის სამართალდამრღვევისთვის ჩაბარების არსი სწორედ ის არის, რომ მხარეს ჰქონდეს სრულფასოვანი ინფორმაცია დაკავების საფუძვლების შესახებ", — წერს DRI.

ბოლო ხაზი: DRI აღნიშნავს, რომ მოსამართლე ჩიკაშუას აღნიშნული მიდგომა მნიშვნელოვნად განსხვავდება 29 ნოემბერს მიღებული გადაწყვეტილებისგან, როდესაც მოსამართლე დავით წერეთელმა "რაჭის პროტესტის" დროს დაკავებული პირებიდან მხოლოდ ისინი მიიჩნია ადმინისტრაციულ სამართალდამრღვევებად, რომელთა იდენტიფიცირებაც ვიდეოკადრებით შეძლო. სხვა შემთხვევაში კი, არ დაეყრდნო მხოლოდ პოლიციელთა ჩვენებებს და სამართალწარმოება შეწყვიტა.