მოკლედ: მოძრაობა ხმის წევრებს გიორგი ხასაიას და კაკო ჩიქობავას, რომლებიც კეკელიძის ქუჩაზე ხატიაშვილების ბინიდან გამოსახლების დროს დააკავეს, პროკურატურამ ბრალდება წარუდგინა.

  • ინფორმაცია On.ge-ს ხმაში დაუდასტურეს.
  • მათი ცნობით, პროკურატურა პატიმრობას ითხოვს.

რა მოხდა აქციაზე: 23 იანვარს, აღსრულების პოლიცია კეკელიძის N1-ში ხატიაშვილების ბინიდან გამოსასახლებლად მივიდა.

  • ადგილზე შეკრებილები იყვნენ მოქალაქეები, რომლებიც ცდილობდნენ, ამ პროცესისთვის ხელი შეეშალათ.
  • პოლიციამ 23 იანვარს 20 ადამიანი დააკავა, მათგან 18 — ადმინისტრაციული, ხოლო ორი, ჩიქობავა და ხასაია — სისხლის სამართლის წესით.
  • მათ აღსრულების პოლიციის მანქანის დაზიანების გამო, წარდგენილი აქვთ ბრალდება მუხლით, რომელიც 3-დან 6 წლამდე პატიმრობას ითვალისწინებს.
  • კაკო ჩიქობავა თსუ-ში საქართველოს ისტორიას ასწავლის, გიორგი ხასაია კი — ილიას სახელმწიფო უნივერსიტეტის ანთროპოლოგიის დოქტორანტია.

გუშინ, კიდევ ერთი ოჯახის — კაკიაშვილების გამოსახლების წინააღმდეგ გამართულ აქციაზე, სამოქალაქო აქტივისტებმა დაკავებულების გამოშვების მოთხოვნა დააყენეს.

  • ისინი ამბობდნენ, რომ მანქანის შუშების ჩამტვრევის გამო 3-დან 6-წლამდე პატიმრობა მძიმე სასჯელია.

დაკავებულების გათავისუფლებას ითხოვს მარინა ხატიაშვილიც.

  • "მათ დამინახეს, რომ გამოვყავდი [პოლიციას] ასე გამწვანებული, თან კეფა დავარტყი. აღელვებულ ხალხს რაღაცა მანქანა დაუზიანებია.
  • პატიმრობის საკითხი ჩვენთვის ძალიან მნიშვნელოვანია, თუ უნდათ, რომ განმუხტონ სიტუაცია, პირველ რიგში, არ უნდა მოხდეს ამ ხალხის[ადმინისტრაციული წესით დაკავებულების] დაჯარიმება და ეს პატიმრები სასწრაფოდ უნდა გათავისუფლდნენ", — თქვა მარინა ხატიაშვილმა On.ge-სთან.