მოკლედ: დემოკრატიის კვლევის ინსტიტუტი (DRI) კეკელიძის ქუჩაზე ხატიაშვილების ოჯახის გამოსახლების პროცესს ეხმიანება და აღნიშნავს, რომ ამ ღონისძიებისთვის უზარმაზარი სახელმწიფო რესურსი დაიხარჯა, კერძოდ:

• "ასეულობით პოლიციელი, რომელიც საპროტესტოდ შეკრებილ ადამიანებს უპირისპირდებოდა და იძულებითი გამოსახლების პროცესის ჩატარებას უზრუნველყოფდა;
• საგანგებო სიტუაციების კოორდინაციისა და გადაუდებელი დახმარების სამსახურის დანაყოფი და სპეციალური აღჭურვილობის მქონე მაშველები - სახელმწიფომ ერთი ოჯახის გამოსახლების და ერთი მსესხებლის ინტერესების დაკმაყოფილებისთვის არაპროპორციული რაოდენობის ადამიანური და ფინანსური რესურსი გამოყო."

დეტალები: DRI-ს განცხადებაში აღნიშნულია, რომ გამსესხებელსა და მოვალეებს შორის დადებული გარიგებები, ხშირ შემთხვევაში, სრულიად უსამართლო და უთანასწორო პირობებით არის შედგენილი.

• ამასთან, სესხის გამო სახლის დაკარგვის შემთხვევები ქვეყანაში ძალიან ხშირია და ეს უსახლკარობის წარმოშობის ერთ-ერთ მთავარ მიზეზად იქცა;
• თუმცა, სახელმწიფო უსამართლო დაკრედიტების დარეგულირებისთვის არანაირ საკანონმდებლო ბერკეტს არ იყენებს.
• სახელმწიფო არც უკანასკნელი საცხოვრებლიდან გამოსახლებულ ადამიანებზე იღებს პასუხისმგებლობას.

"აღსრულების პოლიციას შორის რამდენჯერმე მოხდა ფიზიკური დაპირისპირება, რა დროსაც საპატრულო პოლიციამ 20 ადამიანი, მათ შორის, ჟურნალისტები დააკავა. შსს-ს არ გაუკეთებია განცხადება, რა გახდა მათი დაკავების და ჟურნალისტურ საქმიანობაში ხელის შეშლის საფუძველი. ზოგ შემთხვევაში დაკავებულებს აღენიშნებოდათ ფიზიკური დაზიანებები. საპროტესტო შეკრებაზე მყოფი ადამიანები საუბრობენ პოლიციელების მხრიდან ფიზიკურ ძალადობაზე", — წერია მათ განცხადებაში.

დემოკრატიის კვლევის ინსტიტუტი მოუწოდებს:

• სპეციალურ საგამოძიებო სამსახურს - შეისწავლოს სამართალდამცავთა მოქმედების კანონიერება და არაპროპორციული ძალის გამოყენების შესაძლო შემთხვევებზე მოახდინოს სათანადო რეაგირება;
• საქართველოს სახალხო დამცველს - დაინტერესდეს მიმდინარე მოვლენებით, მათ შორის, დაკავებულების მდგომარეობით;
• საქართველოს პარლამენტს - შეცვალოს იპოთეკური სესხების მომწესრიგებელი უსამართლო კანონმდებლობა, რომელიც შესაძლებელს ხდის უკანასკნელი საცხოვრებლის დაკარგვას.

ბოლო ხაზი: ხატიაშვილის ოჯახი ბინიდან გუშინ გამოასახლეს.

• შსს-მ განაცხადა, რომ 20 ადამიანი დააკავეს — პოლიციელისადმი დაუმორჩილებლობისა და საზოგადოებრივი წესრიგის დარღვევის ფაქტებზე, ადმინისტრაციული წესით 18 პირი;
• აღსრულების პოლიციის მანქანის დაზიანებისთვის — 2.
• ამასთან, გუშინ საქართველოს ჟურნალისტური ეთიკის ქარტიამ განაცხადა, რომ ჟურნალისტი რატი რატიანი პირდაპირ ეთერში აშუქებდა აღსრულების პოლიციის მიერ კეკელიძის ქუჩაზე საცხოვრებელი კორპუსიდან ხატიაშვილების ოჯახის გამოსახლების პროცესს, რა დროსაც ის პოლიციელმა უხეში ძალის გამოყენებით ძირს ჩააგდო, რითაც სერიოზული საფრთხე შეუქმნა მის ჯანმრთელობასა და სიცოცხლეს.
• როგორც მაუწყებლის წარმომადგენელმა ეთიკის ქარტიას უთხრა, პარალელურად, სამართალდამცავები ფიზიკურად გაუსწორდნენ ამ მედიასაშუალების კიდევ სამ ჟურნალისტს — ნათია ქარჩილაძეს, ანი გიორგაძეს და გიორგი არობელიძეს.