მოკლედ: შინაგან საქმეთა სამინისტროს ინფორმაციით, დღეს კეკელიძის ქუჩაზე, სადაც სააღსრულებო ბიუროს მიერ ხატიაშვილების ოჯახის გამოსახლების პარალელურად მათი მხარდამჭერი აქცია მიმდინარეობდა, 20 პირი დააკავეს.

დეტალები: შსს-ს განცხადებაში წერია, რომ აქციაზე შეკრებილმა მოქალაქეებმა ეროვნული ბიუროს თანამშრომლებს გაუწიეს ფიზიკური წინააღმდეგობა და პროცესის განხორციელების საშუალებას არ აძლევდნენ.

• პოლიციას მიაყენეს ფიზიკური და სიტყვიერი შეურაცხყოფა;
• სამართალდამცველების მიმართ გამოიყენეს დაუდგენელი საშუალება, სპრეის სახით.
• ასევე, შეკრებილებმა დააზიანეს აღსრულების პოლიციის მანქანა, ამ ფაქტზე 2 პირია დაკავებული.
• პოლიციელისადმი დაუმორჩილებლობისა და საზოგადოებრივი წესრიგის დარღვევის ფაქტებზე, ადმინისტრაციული წესით ასევე, დაკავებულია 18 პირი.

მსგავსი: ქარტია —პოლიციელმა ჟურნალისტი უხეში ძალის გამოყენებით ძირს ჩააგდო და საფრთხე შეუქმნა მის ჯანმრთელობასა და სიცოცხლეს

მანქანის დაზიანებაზე დაიწყო გამოძიება 187-ე მუხლის მე-2 ნაწილის „გ“ ქვეპუნქტით დაიწყო, რაც ჯგუფურად ნივთის დაზიანებას გულისხმობს.

სამართალდამცველების მიმართ წინააღმდეგობისა და საზოგადოებრივი წესრიგის დაცვისათვის ხელის შეშლის ფაქტზე კი გამოძიება სისხლის სამართლის კოდექსის 353- ე მუხლით დაიწყო.

რა ხდებოდა დღეს კეკელიძის ქუჩაზე: აღსრულების პოლიცია ხატიაშვილების სახლთან, დაახლოებით, 10 საათზე მივიდა.

• საცხოვრებელ კორპუსთან შეიკრიბა მოქალაქეების ჯგუფი, რომელიც გამოსახლების პროცედურებისთვის ხელის შეშლას ცდილობდა.
• აქტივისტები, რომლებიც ხატიაშვილების ბინაში იმყოფებოდნენ, ამბობდნენ, რომ შენობაში გაუშვეს დაუდგენელი გაზი, რის გამოც სუნთქვა უჭირდათ.
• საბოლოოდ, პოლიციამ ბინიდან გამოიყვანა როგორც ხატიაშვილების ოჯახი, ასევე იქ მყოფი აქტივისტები.

ამ თემაზე: სად იმყოფება გამოსახლების შემდეგ და რა მდგომარეობაშია მარინა ხატიაშვილი

რა ვიცით ხატიაშვილების ოჯახის პრობლემაზე: აღსრულების ეროვნული ბიუროს ინფორმაციით, მათი გამოსახლების პროცესი, აღსრულების პოლიციის მიერ, 6 წლის განმავლობაში 5-ჯერ იყო გადადებული.

• "ამ დროის მანძილზე აღსრულების ეროვნულმა ბიურომ საქმის მორიგებით დასრულების მიზნით, გაატარა ყველა ღონისძიება, აქტიურად მიმდინარეობდა მხარეებს შორის მოლაპარაკებები, სადაც კრედიტორი მოვალეს სთავაზობდა ალტერნატიულ საცხოვრებელ ფართს, რაზედაც მოვალემ განაცხადა უარი", — აღნიშნულია ბიუროს განცხადებაში.

ხატიაშვილების მსგავსად, 24 და 26 იანვარს, აღსრულების ეროვნული ბიურო კაკიაშვილებისა და ბალახაძეების ოჯახების გამოსახლების გეგმავს.

• "აღსანიშნავია, რომ, როგორც ირკვევა, სამივე ოჯახი თანახმაა, დაფაროს ძირითადი ფინანსური დავალიანება, თუმცა ამ ეტაპზე მათ ამის საშუალება არ ეძლევათ", — აცხადებს სოციალური სამართლიანობის ცენტრი (SJC).

ორგანიზაცია, ასევე, წერს, რომ მსგავსი შემთხვევები საქართველოში გამონაკლისს არ წარმოადგენს: "მანკიერ ფულად-საკრედიტო პოლიტიკაში კრედიტორთა უმთავრესი ინტერესი იპოთეკით დატვირთული ქონების დაუფლებაა — მევახშეები ბოროტად სარგებლობენ მსესხებლის მძიმე სოციალურ-ეკონომიკური მდგომარეობით, რასაც წლების განმავლობაში, სასესხო ხელშეკრულებების კაბალური პირობებით დადება და საცხოვრისის დაკარგვის მომეტებული რისკები მოჰყვება", — ნათქვამია მათ განცხადებაში.