მოკლედ: ისრაელის არმია აცხადებს, რომ მისი 24 ჯარისკაცი დაიღუპა ორშაბათს ღაზაში — ეს იყო ყველაზე დიდი დანაკარგი 1 დღის განმავლობაში ისრაელის ძალებისთვის, სახმელეთო ოპერაციის დაწყების შემდეგ.

დეტალები: დაღუპულებს შორის არის 21 რეზერვისტი, რომლებიც, სავარაუდოდ, ისრაელის ჯარის მიერ შენობების ასაფეთქებლად დამონტაჟებული ნაღმების აფეთქებას ემსხვერპლნენ.

  • ვარაუდობენ, რომ ჰამასის მიერ ნასროლი რაკეტა, მანამდე, მოხვდა ტანკს, რომელიც იცავდა ისრაელის ჯარს.
  • ისრაელის თავდაცვის ძალები მომხდარს იძიებს.

ისრაელის თავდაცვის ძალების წარმომადგენელი დანიელ ჰაგარი აცხადებს, რომ რეზერვისტები ცენტრალურ ღაზაში ორშაბათს, დაახლოებით, 16 საათზე დაიღუპნენ.

პანაშვიდები იერუსალიმში, ჰერცლის მთაზე გაიმართა.

ხან-იუნისი

ხან-იუნისი

ფოტო: AFP

რა ვითარებაა ფრონტის ხაზზე: ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ მიუხედავად დანაკარგებისა, ქვეყანამ შეტევა მანამდე უნდა გააგრძელოს, ვიდრე სრულ გამარჯვებას არ მიაღწევს.

  • მძიმე ბრძოლები მიმდინარეობს ღაზის სამხრეთით, ხან-იუნისში მდებარე საავადმყოფოებთან, რომელიც სავსეა დევნილებით.
  • ისრაელის თავდაცვის ძალების ინფორმაციით, ქალაქი ალყაში ჰყავთ მოქცეული.
  • ისრაელი მიიჩნევს, რომ ჰამასის ლიდერები, შესაძლოა, სწორედ იქ იმალებოდნენ და აქვე ჰყავდეთ ისრაელელი მძევლები.
  • პალესტინის ინფორმაციით, ბოლო ბრძოლების დროს დაიღუპნენ ქალები და ბავშვები.
  • მიცვალებულებს ნასერის საავადმყოფოს ეზოშივე კრძალავენ, რადგან სასაფლაომდე მისვლა უსაფრთხო არ არის.
  • ისრაელის ჯარებმა შეუტია კიდევ ერთ საავადმყოფოს, ალ-ხაირს, მისი თანამშრომლები დააპატიმრეს.

რა არის ცნობილი დაღუპულების რაოდენობაზე: ისრაელის თავდაცვის ვებგვერდის მიხედვით, 27 ოქტომბრის შემდეგ, რაც ისრაელმა სახმელეთო შეჭრა დაიწყო, 217 ჯარისკაცი დაიღუპა.

  • სულ, 7 ოქტომბრის შემდეგ ომს 552 ისრაელელი ჯარისკაცი ესხვერპლა.
  • პალესტინის ჯანდაცვის სამინისტროს ინფორმაციით, ომის შედეგად, ღაზაში, სულ მცირე, 25 490 ადამიანი დაიღუპა, ძირითადად, ქალები და ბავშვები.
  • უწყების ცნობით, ბოლო 1 დღეში ომს 195 პალესტინელი ემსხვერპლა.