76 წლის მომღერალი ელტონ ჯონი მე-19 ადამიანი გახდა, რომელსაც გართობის ინდუსტრიაში ოთხი ყველაზე პრესტიჟული ჯილდო — გრემი, ოსკარი, ემი და ტონი აქვს მიღებული.

ელტონი ე.წ. EGOT-ის მფლობელთა სიას ცოტა ხნის წინ შეუერთდა, როდესაც მან გამოსამშვიდობებელი კონცერტის ფილმისთვის Elton John Live: Farewell From Dodger Stadium ემის ჯილდო მიიღო.

ამ პრესტიჟული ჯილდოების მფლობელთა სიაში ისეთი ადამიანები შედიან, როგორებიც არიან: ოდრი ჰეპბერნი, ჯონ ლეჯენდი, ვაიოლა დევისი, ჯენიფერ ჰადსონი და სხვები.

მართალია, თავად მომღერალი დაჯილდოების ცერემონიას ვერ დაესწრო, თუმცა მისი სამადლობელი სიტყვა წაიკითხეს.

"გზა, რომელიც ამ მომენტამდე გავიარე, სავსე იყო მონდომებით, ძალისხმევითა და ჩემი გულშემატკივრების მუდმივი მხარდაჭერით. დღევანდელი დღე ხელოვნების ძალის დასტურია და იმ სიხარულის, რომელიც მას ადამიანებისთვის მოაქვს", — აღნიშნავს არტისტი.

ელტონ ჯონი 5 გრემის, 2 ოქროს გლობუსისა და 1 ტონის ჯილდოს მფლობელია. მან ოსკარის 2 ნომინაციაშიც გაიმარჯვა, მათ შორის, სიმღერისთვის I'm Gonna Love Me Again, რომელიც ლეგენდარულ მომღერალზე გადაღებული ბიოგრაფიული ფილმიდანაა.

76 წლის მომღერლისა და შემსრულებლის კარიერა უკვე 6 ათწლეულს ითვლის. ელტონ ჯონი მსოფლიოს 80-ზე მეტ ქვეყანაში 3 500-ზე მეტ კონცერტზე გამოსულა. თუმცა, მან განაცხადა, რომ საკუთარი ოჯახისთვის მეტი დროის დათმობა სურდა და ამიტომ საკონცერტო კარიერას ასრულებდა. ამის მიუხედავად, ელტონი ახალ სიმღერებზე მუშაობას განაგრძობს.

300 მილიონზე მეტი გაყიდული ჩანაწერით ელტონ ჯონი ყველა დროის ერთ-ერთი ყველაზე პოპულარული მუსიკოსია. მუსიკის ინდუსტრიაში შეტანილი განსაკუთრებული წვლილისა და საქველმოქმედო საქმიანობისთვის მომღერალმა 1998 წელს დედოფალი ელიზაბეთ II-ისგან რაინდის წოდებაც მიიღო.

იხილეთ ასევე:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...