რა ხდება: იძებნება მოზარდი, რომელიც კახეთის გზატკეცილზე, კოსმონავტის ძეგლის მიმდებარედ არსებული "გალფის“ ბენზინგასამართ სადგურთან ძაღლმა გაკაწრა.

  • სურსათის ეროვნული სააგენტოს ინფორმაციით, მიუსაფარი ძაღლი მოკვდა და ლაბორატორიული კვლევის შედეგად, ცოფი დაუდასტურდა.

დეტალები: სააგენტო წერს, რომ შეტყობინება მათთან ძაღლის სიკვდილის შემდეგ, 18 დეკემბერს შევიდა. პათოლოგიური მასალა დაუყოვნებლივ გადაიგზავნა ლაბორატორიაში და კვლევის შედეგები რამდენიმე საათის წინ გახდა ცნობილი.

  • პირს, რომელმაც სურსათის ეროვნულ სააგენტოს ძაღლის სიკვდილის შესახებ შეატყობინა, არ აქვს მოზარდის და მშობლების საკონტაქტო ინფორმაცია.
  • არ არის ცნობილი, ჩაუტარდა თუ არა მოზარდს ცოფის საწინააღმდეგო ვაქცინაცია.

"სურსათის ეროვნულმა სააგენტომ შემთხვევის შესახებ აცნობა ყველა შესაბამის უწყებას. ამავდროულად, სააგენტო მოზარდის მშობლებს ბავშვის დაუყოვნებლივ ვაქცინაციისა და გამოხმაურებისკენ მოუწოდებს", — წერია სააგენტოს მიერ გავრცელებულ განცხადებაში.