საქართველოს ფინანსთა სამინისტროს საგამოძიებო სამსახურის განცხადებით, სამართალდამცავებმა აღმოაჩინეს ობიექტი, სადაც განთავსებული იყო ელექტრონული მოწყობილობა - ე.წ. სიმ ბოქსი. უწყების ინფორმაციით, აღნიშნული მოწყობილობით უკანონოდ ხდებოდა საერთაშორისო ზარების ადგილობრივ ზარად გარდაქმნა.

გამოძიების მიხედვით, დანაშაულებრივი ჯგუფი უცხოური ზარის ადგილობრივ ზარად გარდაქმნით, კანონსაწინააღმდეგოდ, ხელოვნურად ცვლიდნენ შემომავალი ზარების ტარიფებს.

საგამოძიებო სამსახურის ცნობით, ამით მნიშვნელოვნად ზარალდებოდა, როგორც სახელმწიფო ბიუჯეტი, ასევე სატელეფონო კომუნიკაციების სფეროში მომუშავე კომპანიები.

უწყება ასევე აღნიშნავს, რომ მიმდინარე წელს, საქართველოს მასშტაბით ე.წ. სიმ ბოქსის უკანონოდ განთავსება-გამოყენების ათეულობით ფაქტი გამოვლინდა.

გამოძიება მიმდინარეობს საქართველოს სისხლის სამართლის კოდექსის 185-ე და 192-ე მუხლებით.