მოკლედ: აშშ-ის სახელმწიფო დეპარტამენტი ყოველწლიურად აქვეყნებს ანგარიშს ტერორიზმთან დაკავშირებით.

  • ანგარიშებში შეფასებულია სხვადასხვა ქვეყნის მიერ გატარებული ღონისძიებები ტერორიზმთან ბრძოლის თვალსაზრისით.

რა წერია 2022 წლის ანგარიშში: სახდეპის 2022 წლის ანგარიშში ვკითხულობთ, რომ საქართველო, ამ მხრივ, რჩება აშშ-ის მტკიცე პარტნიორად.

  • დეპარტამენტი აღნიშნავს, რომ საქართველოს სახელმწიფო უსაფრთხოების სამსახურმა, 2022 წლის ნოემბერში, აღკვეთა ისრაელის მოქალაქის მკვლელობის მცდელობა და გაასამართლა საქართველოს 5 მოქალაქე, რომლებიც 2021 წელს, ISIS-სთან კავშირის გამო დააკავეს.
  • ასევე, ხაზგასმულია, რომ ერაყსა და სირიაში, ტერორისტულ ქმედებებში, არ გამოვლენილა საქართველოს არც ერთი მოქალაქე.
  • გარდა ამისა, დოკუმენტში აღნიშნულია, რომ საქართველოში ამოქმედდა 2022-2026 წლების ეროვნული ანტიტერორისტული სტრატეგია და სამოქმედო გეგმა, გამკაცრდა ზომები ტერორისტული აქტების შესახებ ცრუ შეტყობინებებზე და გაძლიერდა მუშაობა ფულის გათეთრების წინააღმდეგ.
  • სახდეპი წერს, რომ 2022 წლის განმავლობაში, საქართველო მუშაობდა სახმელეთო საზღვრის, საავიაციო და საზღვაო უსაფრთხოების გაუმჯობესებაზე. ამასთან ერთად, აღნიშნავს, რომ რადგან რუსეთს ოკუპირებული აქვს აფხაზეთი და სამხრეთ ოსეთი, მნიშვნელოვანია უსაფრთხოების გაძლიერება ადმინისტრაციულ საზღვრებთან.
  • ანგარიშში წერია, რომ 2022 წელს, სამართალდამცავებმა აღკვეთეს ულტრამემარჯვენე, პრო-რუსული ჯგუფის, ალტ-ინფოს მცდელობა, ჩაეშალათ თბილისი პრაიდი. თუმცა, ხაზგასმულია ისიც, რომ 2021 წლის 5 ივლისს მომხდარი ძალადობრივი ქმედებების ორგანიზატორებსა და ლიდერებს, მათ შორის, ალტ-ინფოს, არც 2022 წელს დაკისრებიათ შესაბამისი პასუსიხმგებლობა.
  • მთლიანობაში, სახდეპის შეფასებით, საქართველოს შეუძლია ტერორისტული ფაქტების გამოვლენა, შეკავება და მათზე რეაგირება.