მოკლედ: ღაზის ჯანდაცვის სამინისტროს ინფორმაციით, 7 ოქტომბრის შემდეგ, ღაზაში 5 791 ადამიანი დაიღუპა. ეს მონაცემები, გუშინდელთან შედარებით, 700 ადამიანით მეტია.

• ისრაელი — ჰამასის ომის დაწყებიდან, ისრაელში 1 400-ზე მეტი ადამიანი დაიღუპა, მათი უმეტესობა მშვიდობიანი მოქალაქეა და ჰამასის პირველ თავდასხმას ემსხვერპლა.

ვითარება ღაზაში: დღეს ისრაელმა ქალაქი ხან-იუნისი კიდევ ერთხელ დაბომბა.

• BBC ავრცელებს კადრებს, სადაც ჩანს, როგორ ეძებს მოსახლეობა ნანგრევებში ჩარჩენილ ადამიანებს.
• გაეროს სააგენტო, რომელიც პალესტინელ ლტოლვილებს ეხმარება (UNRWA), აცხადებს, რომ თუ ღაზის სექტორში საწვავს დაუყოვნებლივ არ მიიღებენ, იძულებული გახდებიან, მუშაობა შეაჩერონ.

რატომ არ ეთანხმება ისრაელი ღაზაში საწვავის შეტანას: ისრაელის მტკიცებით, საავადმყოფოებისთვის და მოსახლეობისთვის გამოყოფილ საწვავს ჰამასი საკუთარი გენერატორებისთვის იმარაგებს.

• ისრაელის შეიარაღებული ძალები ამბობს, რომ ჰამასს საწვავის 12 ავზი ეგვიპტის საზღვართან ახლოს დგას.
• საერთაშორისო ორგანიზაციების მტკიცებით კი, საავადმყოფოებს ღაზაში საწვავის მარაგი ეწურებათ, რაც უამრავი ადამიანის სიცოცხლეს რისკის ქვეშ აყენებს. ჰუმანიტარულ ტვირთთან ერთად, ღაზის სექტორში საწვავი არ შესულა.
• 7 ოქტომბრამდე ღაზას ელექტრომომარაგებას ისრაელი უზრუნველყოფდა, თავდასხმის შემდეგ კი ისრაელმა სრული ალყა გამოაცხადა და, გამშვები პუნქტების ჩაკეტვასთან ერთად, ღაზას ელექტრომომარაგებაც შეუწყვიტა.

ვითარება ისრაელში: 7 ოქტომბრის შემდეგ, ჰამასის თავდასხმების შედეგად, 5 400 ადამიანია დაჭრილი. დაღუპულთა რიცხვი 1 400-ს აჭარბებს.

• 7 ოქტომბერს, ასევე, ტერორისტებმა, ისრაელის ტერიტორიიდან, მძევლად აიყვანეს 222 ადამიანი. რამდენიმე მათგანი, მოლაპარაკების შედეგად, გაათავისუფლეს.
• მსოფლიო მხარდაჭერა: ისრაელს სოლიდარობა გამოუცხადა უამრავმა ქვეყანამ, მათ შორის, აშშ-მა და ევროკავშირმა.
• ომში მყოფ ქვეყანაში არაერთი ლიდერი ჩავიდა, რომელთა შორის იყვნენ აშშ-ის, გერმანიის, საფრანგეთის, ნიდერლანდების, დიდი ბრიტანეთის პირველი პირები.
• მართალია, ქვეყნების უმეტესობამ ჰამასის თავდასხმები დაგმო, თუმცა ლიდერები და საერთაშორისო ორგანიზაციები მიიჩნევენ, რომ მსხვერპლი მშვიდობიან მოსახლეობაში მინიმუმამდე უნდა იქნას დაყვანილი და ასევე, აუცილებელია, ღაზის სექტორში საკმარისი ოდენობით ჰუმანიტარული ტვირთის შეტანა.
• ჩინეთი და რუსეთი, მიმდინარე კონფლიქტში, არც ისრაელის და არც ჰამასის ქმედებებს არ გმობენ.
• ორივემ, ასევე, განაცხადა, რომ ომი ხაზს უსვამს პალესტინის დამოუკიდებელი სახელმწიფოს ჩამოყალიბების აუცილებლობას.
• ჩინეთის საგარეო საქმეთა მინისტრმა კი განაცხადა, რომ ისრაელის პასუხი გასცდა თავდაცვას.
  პალესტინის მოსახლეობის მიმართ სოლიდარობას ბევრი ქვეყანა გამოხატავს, თუმცა ირანი ერთ-ერთია იმ მცირე რაოდენობის ქვეყნებიდან, რომელიც ღიად უჭერს მხარს ჰამასს.