დეტალები: ისრაელისა და ჰამასის ომის შესახებ მსოფლიოს სხვადასხვა ქვეყნის შეხედულებები მკვეთრად განსხვავებულია.

რატომ არის მნიშვნელოვანი: ისრაელის ლიდერებმა იციან, რომ ღაზაში მსხვერპლის ზრდასთან ერთად, საერთაშორისო ზეწოლა იზრდება. საერთაშორისო აზრი კი, შესაძლოა, უმნიშვნელოვანესი ფაქტორი იყოს, თუ როგორ განვითარდება მოვლენები შემდგომში.

ვის უჭერენ მხარს ქვეყნები: აშშ-მა და ევროპამ ჰამასის 7 ოქტომბრის თავდასხმები დაგმეს და ისრაელს სოლიდარობა გამოუცხადეს.

  • მას შემდეგ, ბრიუსელისა და ვაშინგტონის ლიდერები ხაზს უსვამენ ისრაელის უფლებას, დაიცვას საკუთარი თავი, თუმცა, აქვე, მოუწოდებენ თელ-ავივს, მინიმუმამდე დაიყვანონ მშვიდობიან მოქალაქეებს შორის მსხვერპლი და ხელი შეუწყონ ღაზის სექტორში ჰუმანიტარული ტვირთის შესვლას.
  • რამდენიმე ქვეყნის — მათ შორის, ირანის, სირიის და ლიბანის ხელისუფლებებში აცხადებენ, რომ ომი ისრაელის პროვოცირებულია.
  • თეირანმა ჰამასის თავდასხმებს "70-წლიან ოკუპაციაზე სრულიად ლეგიტიმური პასუხი" უწოდა, თუმცა მოვლენებში საკუთარი პირდაპირი ჩართულობა უარყო.
  • რეგიონის სხვა ქვეყნებს ჰამასის საქციელი არ მოუწონებიათ, თუმცა ხაზი გაუსვეს, რომ მომხდარის სათავე ისრაელის მიერ ტერიტორიების ოკუპაციის ისტორიაა. ამ ქვეყნებს შორის არის საუდის არაბეთიც, რომელიც ომამდე ისრაელთან ურთიერთობების ნორმალიზებასთან დაკავშირებულ მოლაპარაკებაში იყო ჩართული.

ისრაელს მტკიცე მხარდაჭერა გამოუცხადა ინდოეთის პრემიერ-მინისტრმა.

რას ამბობენ აშშ-ის მოწინააღმდეგეები: ჩინეთი და რუსეთი, მიმდინარე კონფლიქტში, არც ისრაელის და არც ჰამასის ქმედებებს არ გმობენ.

  • ორივემ, ასევე, განაცხადა, რომ ომი ხაზს უსვამს პალესტინის დამოუკიდებელი სახელმწიფოს ჩამოყალიბების აუცილებლობას.
  • ჩინეთის საგარეო საქმეთა მინისტრმა კი განაცხადა, რომ ისრაელის პასუხი გასცდა თავდაცვას.
  • პალესტინის მოსახლეობის მიმართ სოლიდარობას ბევრი ქვეყანა გამოხატავს, თუმცა ირანი ერთ-ერთია იმ მცირე რაოდენობის ქვეყნებიდან, რომელიც ღიად უჭერს მხარს ჰამასს.