აზერბაიჯანელი აქტივისტი მოჰიედინ ორუჯოვი 30 დღით, ადმინისტრაციული წესით დააკავეს, მიზეზი, სავარაუდოდ, სოციალურ მედიაში მისი პოსტია, სადაც პრეზიდენტ ილჰამ ალიევს აკრიტიკებდა.

ორუჯოვის ძმამ, ნიზამი ორუჯოვმა OC მედიას განუცხადა, რომ მის ძმას პატიმრობა 19 ოქტომბერს, დაკავებიდან მეორე დღეს შეუფარდეს. ორუჯოვს წვრილმან ხულიგნობასა და პოლიციის მიმართ წინააღმდეგობის გაწევაში ედება ბრალი.

აქტივისტის ძმა, ასევე, ამტკიცებს, რომ დაკავებულს პოლიციის განყოფილებაში სცემეს.

ნიზამი ორუჯოვის განცხადებით, მისი ძმა სამართალდამცველებმა მას შემდეგ გამოიძახეს, რაც სოციალურ მედიაში კომენტარი დაწერა.

  • "პოლიციაში თქვეს, რომ ის განყოფილებაში პრეზიდენტ ილჰამ ალიევის კრიტიკის გამო დაიბარეს. ასევე, თქვეს, რომ მას სასამართლოში მიიყვანდნენ, თუმცა სხვა ინფორმაცია, ჯერჯერობით, არ გვაქვს", — თქვა ორუჯოვმა.


მეიდან TV სურახანის ოლქის სასამართლოს დაუკავშირდა, სადაც დაუდასტურეს, რომ აქტივისტის დაკავების შესახებ ორდერი 19 ოქტომბერს გაიცა და ის წვრილმანი ხულიგნობისა და პოლიციის დაუმორჩილებლობის გამო დააკავეს.

გასული თვის განმავლობაში, ადმინისტრაციული წესით, დაახლოებით, 20 პოლიტიკოსი და პოლიტიკური აქტივისტი დააკავეს, მათ პოლიციისადმი დაუმორჩილებლობას ედავებიან. დაკავებულების უმეტესობა ამბობს, რომ ისინი მთავრობისა და პრეზიდენტ ალიევის შესახებ კრიტიკული პოსტების გამო დაიჭირეს.

მოჰიედინ ორუჯოვი სოციალურ ქსელებში, გამოირჩევა, უმეტესად, პრო-დემოკრატიული აქტიურობით. ის, ასევე, მონაწილეობდა რამდენიმე დემონსტრაციაში, მათ შორის — აქციაში ქალების უფლებებისთვის.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.