"საარჩევნო კოდექსში" შესატანი კანონპროექტის თანახმად, სამხედრო მოსამსახურეები არჩევნებში მონაწილეობას მათი რეგისტრაციის ადგილის მიხედვით მიიღებენ. კერძოდ, სამხედრო მოსამსახურე არ ისარგებლებს საქართველოს პარლამენტის და ადგილობრივი თვითმმართველობის მაჟორიტარულ არჩევნებში, მათ შორის, გამგებლის ან მერის არჩევნებში მონაწილეობის უპირატესობით, თუ იგი არ იმყოფება იმ ოლქში, სადაც დარეგისტრირებულია.

ასევე, საქართველოს თავდაცვის სამინისტროს, შინაგან საქმეთა სამინისტროს და სახელმწიფო უსაფრთხოების სამსახურის სამხედრო ძალები, ხმას მისცემენ სამხედრო შენაერთის დისლოკაციის ადგილთან არსებულ უახლოეს საარჩევნო უბანზე, თუ სამსახურეობრივი პირობები მოითხოვს რეგისტრაციის ადგილისაგან განსხვავებულ მისამართზე ყოფნას.

კანონპროექტის ფარგლებში დადგინდება ის კრიტერიუმები თუ რა შემთხვევაში უნდა შეიქმნას, ან არ შეიქმნას სპეციალური საარჩევნო უბნები.

კანონპროექტის ავტორები განმარტავენ, რომ ინიციატივის მიზანია იმ შემთხვევების ჩამონათვალის განსაზღვრა, თუ როდის და სად შეიძლება შეიქმნას გამონაკლის შემთხვევაში საარჩევნო უბანი. ამ კუთხით, გაირკვევა სამხედრო მოსამსახურეების ხმებით შესაძლო მანიპულაცია.

კანონპროექტის ინიციატორები არიან "საქართველოს იურისტთა ასოციაცია", „სამართლიანი არჩევნებისა და დემოკრატიის საერთაშორისო საზოგადოება“ და „საერთაშორისო გამჭვირვალობა - საქართველო".