ცისტიტი შარდის ბუშტის ანთებაა, რომლის მთავარი გამომწვევი მიზეზიც ბაქტერიული ინფექციაა. უმეტესად მის განვითარებაში დამნაშავე კუჭ-ნაწლავის ტრაქტში მობინადრე ნაწლავური ჩხირია (E. coli), რომელიც შეიძლება შარდსადენსა და შარდის ბუშტში მოხვდეს და ცისტიტი გამოიწვიოს.

ცისტიტი მდედრობითი სქესის წარმომადგენლებში უფრო მეტად არის გავრცელებული, რადგან ქალების შარდსადენი მილი კაცებზე მოკლეა და ბაქტერიები შარდის ბუშტში უფრო მარტივად ხვდება.

რა ნიშნებს უნდა მივაქციოთ ყურადღება? როგორია მისი მკურნალობისა და პრევენციის გზები? — ცისტიტის შესახებ მეტის გასაგებად წაიკითხეთ ინტერვიუ თოდუას კლინიკის უროლოგ, კახა ბარნოვთან.

როგორ ამოვიცნოთ ცისტიტი? რა სიმპტომები ახასიათებს მას?

ხშირი შარდვა, ტკივილი ან წვის შეგრძნება შარდვის დროს, მუქი, მღვრიე ან/და სისხლიანი შარდი, ტკივილი მუცლის ქვედა ნაწილში ან მენჯში, შარდის ბუშტის არასრულად დაცვლის შეგრძნება — ეს ცისტიტის კლინიკური ნიშნებია. ზოგიერთ შემთხვევაში პაციენტს შეიძლება ჰქონდეს მსუბუქი ცხელებაც.

ამ სიმპტომების დროს აუცილებელია ექიმთან ვიზიტი და ლაბორატორიული ანალიზის ჩატარება, რათა დავადგინოთ საქმე ცისტიტთან გვაქვს თუ სხვა ტიპის პრობლემასთან.

როგორ ხდება ცისტიტის მკურნალობა?

რადგანაც დაავადება ცისტიტი უმეტესად ბაქტერიითაა გამოწვეული, მკურნალობაც ხშირად ანტიბიოტიკებით მიმდინარეობს. ხშირად პაციენტები ჩივილების გაქრობის ან შემსუბუქების შემდეგ, არ ასრულებენ მკურნალობის სრულ კურსს. ეს კი არასწორია, რადგან აუცილებელია ინფექცია ორგანიზმიდან ბოლომდე გაქრეს, თუკი გვინდა უსიამოვნო სიმპტომებმა ხელახლა აღარ იჩინოს თავი.

პაციენტებს, ასევე, ვურჩევთ მიიღონ ბევრი წყალი და მოშარდონ ხშირად, რათა დაჩქარდეს ბაქტერიის საშარდე გზებიდან გამოდევნა. აუცილებელია შეიზღუდოს ისეთი გამღიზიანებლებიც, როგორებიცაა კოფეინი, ალკოჰოლი და ცხარე საკვები.

რამდენად გვხდება ცისტიტი ბავშვებში?

ბავშვებში ცისტიტის განვითარების შემთხვევები, ზრდასრულებთან შედარებით, უფრო ნაკლებია. ის შეიძლება გამოიწვიოს ბაქტერიულმა ინფექციამ, რაც ხშირად არასათანადო ჰიგიენის გამო ხდება. შეიძლება ცისტიტის განვითარებას ბავშვებში საშარდე გზებში სტრუქტურულმა დარღვევებმა შეუწყოს ხელი. ზოგიერთ ბავშვს შეიძლება ჰქონდეს შარდვის დისფუნქცია, უჭირდეს შარდის ბუშტის სრულად დაცლა, რაც, ასევე, ზრდის ცისტიტის განვითარების რისკს.

მშობლებმა ცისტიტზე ეჭვი უნდა მიიტანონ მაშინ, თუ ბავშვი ხშირად შარდავს ან ჭარბად გამოყოფს შარდს, ტირის ან აქვს დისკომფორტი შარდვის დროს. ასევე, მნიშვნელოვანი სიმპტომია შარდში სისხლი, ცხელება, გაღიზიანება, ცუდად კვება და ა.შ.

შეგახსენებთ, რომ ცისტიტის მკურნალობისთვის შეგიძლიათ თოდუას კლინიკის უროლოგები იხილოთ მითითებულ ბმულზე.

თუკი ცისტიტი ორსულობის დროს განვითარდა, როგორ უნდა მოიქცეს ფეხმძიმე ქალი?

პირველ რიგში, მინდა აღვნიშნო, რომ ცისტიტის ან საშარდე გზების ინფექციის (UTI) რისკი ორსულობისას იზრდება. ამას ხელს ჰორმონალური ცვლილებები უწყობს. ამასთან ერთად, შარდის ბუშტს გაზრდილი საშვილოსნო მეტად აწვება, რამაც შესაძლოა შარდის ნაკადი შეაფერხოს და გაზარდოს ბაქტერიებით ინფიცირების რისკი.

აუცილებელია, ორსულმა ქალმა არ უგულებელყოს ცისტიტის ნიშნები და დროულად დაიწყოს მკურნალობა, რათა არ გადაიზარდოს ის უფრო სერიოზულ გართულებებში, მაგალითად, თირკმლის მწვავე ანთებაში. მკურნალობა ორსულობის დროსაც ანტიბიოტიკებით ხდება, ოღონდ ისეთებით, რომლებიც უსაფრთხოა ორსულობისას.

შეგიძლიათ მკითხველს მისცეთ რჩევები ცისტიტის პრევენციისთვის?

რა თქმა უნდა, არსებობს ზოგადი რეკომენდაციები, რომელთა დაცვაც მნიშვნელოვნად ამცირებს ცისტიტის განვითარების რისკს. აუცილებელია, დღის განმავლობაში საკმარისი რაოდენობის წყალი დალიოთ, რათა შეინარჩუნოთ ჰიდრატაცია. ასევე, არ უნდა შეიკავოთ შარდი და ყოველ ჯერზე სრულად დაცალოთ შარდის ბუშტი. მნიშვნელოვანია ტუალეტის შემდეგ საწმენდი საშუალება გამოიყენოთ წინიდან უკან, რათა არ მოხდეს ბაქტერიები ანუსიდან ურეთრაში. სასურველია, მოერიდოთ უხეშ საპონს ან სხვა ტიპის გამღიზიანებლების გამოყენებას სასქესო ორგანოზე და უპირატესობა მიანიჭოთ ბუნებრივი ქსოვილისგან დამზადებულ, სუნთქვად საცვალს.