რატომ არის მნიშვნელოვანი: Wolt-ის კურიერების პროტესტი საქართველოში თებერვლიდან დაიწყო და რამდენიმე თვე გაგრძელდა — ნაწილმა აპლიკაცია გათიშა და გაიფიცა.

  • კურიერები ითხოვდნენ სამუშაო პირობების გაუმჯობესებას, ანაზღაურების ზრდას, აპლიკაციაში არსებული ხარვეზის გამოსწორებას, შრომის უსაფრთხოების უზრუნველყოფასა და ხელმძღვანელობასთან კოლექტიურ შეხვედრას, საუბრობდნენ დევნაზეც.
  • "სამარცხვინოა, რომ ევროკავშირში რეგისტრირებული ფინური კომპანიის დაქირავებული დირექტორები საქართველოში მოქმედებენ საბჭოთა კაგებეს მეთოდებით და ცდილობენ ადამიანის დაშინებას", — ამბობდა პროტესტის ერთ-ერთი მონაწილე.
  • კომპანია ამტკიცებდა, რომ ზოგიერთი კურიერი გასცდა პროტესტის მშვიდობიან ფორმებს და ემუქრებოდა თანამშრომლებს.
  • აქციის მონაწილეებთან შეხვედრების შემდეგ, Wolt-მა სამუშაო რუკის ცვლილებაზე გადაწყვეტილება მიიღო და განაცხადა, რომ სადაზღვევო კომპანიასთან სამუშაოდ ცალკე გუნდი გამოყო.

დეტალები: სახალხო დამცველის განცხადებით, საქმეში არსებული მასალების მიხედვით, კომპანიამ ორ კურიერს პრობლემების შესახებ საჯაროდ საუბრისა და სხვა საპროტესტო აქტივობების გამო, აპლიკაციაზე წვდომა დაუბლოკა.

  • ომბუდსმენმა დისკრიმინაციულად შეაფასა ვოლტ ჯორჯიას მიერ სხვა 142 კურიერისთვის გაგზავნილი შეტყობინება, რომლითაც კომპანია მათ საპროტესტო აქტივობებში მონაწილეობისგან თავის შეკავებისკენ მოუწოდებდა.
  • სახალხო დამცველმა კომპანიას მიმართა, რომ დაუყოვნებლივ აღუდგეთ კურიერებს აპლიკაციაზე წვდომა, მომავალში არ დაუშვას შრომით ურთიერთობაში განსხვავებული მოსაზრების ან/და სხვა ნიშნით დისკრიმინაციული მოპყრობა და უზრუნველყოს თანასწორობის პოლიტიკის გატარება.