ცნობილი ქართველი რეჟისორი ლანა ღოღობერიძე კინოცენტრში მიმდინარე მოვლენებს ფორმულასთან მიცემულ ინტერვიუში გამოეხმაურა. ღოღობერიძემ კინოცენტრის ისტორიაზე და მის მნიშვნელობაზე ისაუბრა და ყურადღება გაამახვილა იმაზე, თუ რატომაა აუცილებელი, დირექტორი ხელისუფლებამ კი არ დანიშნოს, არამედ კინოს სფეროს წარმომადგენლებმა აირჩიონ.

"არ შეიძლება, კინოცენტრის დირექტორი დაინიშნოს ხელისუფლების მიერ. ეს არის ამოსავალი წერტილი კინოს არსებობის, დამოუკიდებლობის, თავისუფლების და ა.შ. როდესაც თავიდან კინემატოგრაფების გუნდი ვფიქრობდით, როგორ უნდა დაგვეარსებინა, როგორი უნდა ყოფილიყო კინოცენტრი და როგორ უნდა მომხდარიყო კინოს მართვა, მთავარი პრინციპი ის იყო, რომ დირექტორი აუცილებლად უნდა ყოფილიყო არჩეული 2 წლით კინემატოგრაფისტებისა და კინოსთან ახლოს მყოფი ხელოვნების სხვა წარმომადგენლების მიერ. ამდენად, ის იქნებოდა ვალდებული ამ ხალხის წინაშე, ანუ კინოსაზოგადოების წინაშე და არა ზოგადად ხელისუფლების მიმართ. აი, ეს არის მთავარი პრინციპი.

არსი იმისა, რომ არსებობდეს ხელოვნება, არის ის, რომ ის იყოს დამოუკიდებელი და თავისუფალი. საბჭოთა დროსაც კი ჩვენ ამას როგორღაც ვახერხებდით...ისეთი იდეოლოგიური წნეხი იყო და ამ წნეხის გარღვევას ვცდილობდით ყველანაირი ხერხით. სპეციალური კინოენაც კი მოვიგონეთ, სადაც ნაკლები სიტყვა იქნებოდა, რადგან ცენზურა ადვილია სიტყვით და ბევრად უფრო რთულია გამოსახულებით.

...ესაა საფუძველი იმისა, რომ მერე დამოუკიდებელ საქართველოში, ასე ვთქვათ, დემოკრატიულ ქვეყანაში არ შეიძლება დავუშვათ, რომ კინო ისევ წნეხის ქვეშ იყოს ხელისუფლების მხრიდან", — განაცხადა ღოღობერიძემ.

რა ხდება კინოცენტრში?

14 მარტს კულტურის სამინისტრომ კინოცენტრის დირექტორი, გაგა ჩხეიძე თანამდებობიდან გაათავისუფლა. მიზეზად აუდიტის დასკვნა დაასახელა, რომლის მიხედვითაც, "ფინანსური რესურსების კანონმდებლობასთან შეუსაბამო ხარჯვის ფაქტები გამოვლინდა". პირველ ივნისს გოეთეს ინსტიტუტმა ჩხეიძე მედლით დააჯილდოვა და განაცხადა, რომ ის უკრაინის მხარდაჭერის გამო გაათავისუფლეს. კინოცენტრი ამას ვრცელი განცხადებით გამოეხმაურა, სადაც გოეთეს ინსტიტუტის საიტზე აღნიშნულ ინფორმაციას "ფარისევლური ბრალდება" და "უტიფარი სიყალბე" უწოდა. ასევე, თქვა, რომ გადაისინჯება გადაწყვეტილება ჩხეიძის დირექტორობით ჩატარებული კინოფესტივალის დაფინანსების გაგრძელებაზე. კინოცენტრის განცხადებას რამდენიმე თანამშრომელი გაემიჯნა და პოსტს სამარცხვინო უწოდა.

პირველ ივნისს ცნობილი გახდა, რომ კულტურის სამინისტრომ კინოცენტრში დირექტორის მოვალეობის შემსრულებლად დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის ყოფილი მოადგილე, კობა ხუბუნია დანიშნა. მან კინოცენტრის დირექტორის მოადგილის ორი პოსტი გააუქმა და ცენტრში რეორგანიზაცია გამოაცხადა.

13 ივნისს პროპაგანდისტული და სახელისუფლებო POSTV-ის წამყვანმა, ბაჩო ოდიშარიამ, რომელსაც გადაცემა სექსუალურ შევიწროებაში არაერთგზის მხილებულ შალვა რამიშვილთან ერთად მიჰყავს, ფორმულასთან დაადასტურა, რომ ცენტრში კინოწარმოების დეპარტამენტის უფროსის მოადგილედ დაინიშნა.

კინოცენტრში დასაქმებულები რეორგანიზაციას აღიქვამენ მინისტრ თეა წულუკიანის მცდელობად, ქართული კინო კულტურის სამინისტროს პოლიტიკური გავლენის ქვეშ მოექცეს და "კინოცენტრის ხელთ არსებული ყველა ბერკეტი კინოსექტორზე სრულმასშტაბიანი კონტროლის დამყარებისკენ მიიმართოს".

მათ კინოცენტრის ფეისბუქ გვერდზე ღია წერილიც გამოაქვეყნეს, სადაც დამოუკიდებლობის შენარჩუნებას ითხოვდნენ, თუმცა განცხადება სოციალური ქსელიდან მალევე წაიშალა.

ახლა კინოცენტრის თანამშრომლები მოითხოვენ:

• შეწყდეს რეორგანიზაციის პროცესი, სადაც ცენტრს კონკურსის გზით დანიშნული დირექტორი არ ეყოლება;
• კინოცენტრის დირექტორი დაინიშნოს კონკურსის საფუძველზე და არა მინისტრის ერთპიროვნული გადაწყვეტილებით;
• დირექტორის შესარჩევი კომისია დაკომპლექტდეს კინოსექტორის წარმომადგენლებისგან.

ამავე თემაზე:

ყველაფერი კინოცენტრში მიმდინარე რეორგანიზაციასა და პროტესტზე — მოკლედ