რატომ არის მნიშვნელოვანი: 6 ივნისს, დილით, ოკუპანტებმა უკრაინაში ერთ-ერთი ყველაზე დიდი, კახოვკის ჰიდროელექტროსადგური ააფეთქეს.

• მედიაში გავრცელებულ კადრებში ჩანს, რომ დაწყებულია წყლის ნაკადის დასახლებული ტერიტორიისკენ გადინება, რაც დატბორვის საფრთხეს ზრდის.
• მაგალითად, არსებობს მიმდებარე რაიონების, განსაკუთრებით, მდინარე დნეპრის მარჯვენა სანაპიროს დატბორვის საფრთხე.
• რუსული პროპაგანდისტული მედია ავრცელებს ინფორმაციას, თითქოს, ჰიდროელექტროსადგური უკრაინამ დაბომბა და ახლა მზადაა, ტერიტორიიდან მშვიდობიანი მოქალაქეები გაიყვანოს.

უკრაინული მხარე: ჰიდროელექტროსადგურის აფეთქებას ვოლოდიმირ ზელენსკი გამოეხმაურა და თქვა, რომ რუსი ტერორისტები ჩადენილით მხოლოდ უდასტურებენ მთელს მსოფლიოს, რომ ისინი უკრაინის მიწის ყველა ნაწილიდან უნდა განიდევნონ.

• ამბობს, რომ მათ ერთი მეტრი მიწაც არ უნდა დარჩეთ, რადგან ისინი ყველა მეტრს ტერორისთვის იყენებენ და მხოლოდ უკრაინის გამარჯვება დააბრუნებს უსაფრთხოებას.
• "ტერორისტები ვერ შეძლებენ, შეაჩერონ უკრაინა წყლით, რაკეტებითა თუ ნებისმიერი სხვა გზით. კახოვკაში ყველა სამსახური მუშაობს. მე მოვიწვიე ეროვნული უშიშროების საბჭო", — ამბობს პრეზიდენტი.
• უკრაინის საგარეო საქმეთა მინისტრი, დმიტრო კულება ამბობს, რომ ამით რუსეთმა ბოლო ათწლეულების განმავლობაში ევროპის უდიდესი ტექნოლოგიური კატასტროფა გამოიწვია და ათასობით მოქალაქის სიცოცხლე საფრთხეში ჩააგდო.
• "ეს არის ომის საზარელი დანაშაული. 21-ე საუკუნის უდიდესი ტერორისტის, რუსეთის შეჩერების ერთადერთი გზა მისი უკრაინიდან გაგდებაა", — წერს კულება.
• პრეზიდენტის ადმინისტრაციის ხელმძღვანელმა, ანდრეი ერმაკმა განაცხადა, რომ რუსების მიერ კახოვკას ჰიდროელექტროსადგურის აფეთქება მორიგი სამხედრო დანაშაული და ეკოციდია.
• როგორც იერმაკმა Telegram-ზე აღნიშნა, ამის გამო პრეზიდენტი ვოლოდიმირ ზელენსკი სასწრაფოდ იწვევს ეროვნული უსაფრთხოებისა და თავდაცვის საბჭოს.
• "დღეს ადამიანების უსაფრთხოება პრიორიტეტია. ჩვენ მტრი უნდა დაისაჯოს საერთაშორისო დონეზე", — წერს ერმაკი.

საერთაშორისო გამოხმაურება: მოლდოვის პრეზიდენტმა, მაია სანდუმ ჰიდროელექტროსადგურის აფეთქება ომის დანაშაულად შეაფასა და მომხდარი დაგმო.

• "პრეზიდენტო ზელენსკი, ჩვენ მზად ვართ, დაგეხმაროთ წყალდიდობასთან გამკლავებაში და მხარი დაგიჭიროთ ზიანის შემცირების ძალისხმევაში", — დაწერა მან ტვიტერზე.
• რუსეთის მიერ ჩადენილ ქმედებას ომის დანაშაულად მოიხსენიებს ევროსაბჭოს პრეზიდენტი, შარლ მიშელიც.
• "შოკირებული ვარ ნოვა კახოვკის ჰიდროელექტროსადგურზე უპრეცედენტო თავდასხმით. რუსეთი და მისი მარიონეტები პასუხს აგებენ", — წერს მიშელი.
• ევროსაბჭოს გენერალურმა მდივანმა კი ჰესის აფეთქებას დანაშაული და უგუნურობა უწოდა.
• "ვგმობ რუსეთის მიერ უკრაინაში კაშხლის განადგურებას", — დაწერა მარია პეიჩინოვიჩ ბურიჩმა.
• მომხდარს გამოეხმაურა ნატოს გენერალური მდივანი, იენს სტოლტენბერგი.
• "ეს არის აღმაშფოთებელი ქმედება, რომელიც კიდევ ერთხელ ადასტურებს რუსეთის ომის სისასტიკეს უკრაინაში", — დაწერა მან.

გარდა ამისა უკრაინის მხარდაჭერის გაგრძელებისა და ომის დამნაშავეების დასჯის აუცილებლობას ხედავს ლატვიის პრეზიდენტი, ედგარს რინკევიჩი.

• "ეს არის ეკოლოგიური კატასტროფა, ადამიანებს საფრთხე ემუქრებათ. რუსეთი ტერორისტული სახელმწიფოა და საჭიროა მისი შეჩერება", — დაწერა მან.
• ჰიდროელექტროსადგურის აფეთქება ტვიტერზე დაგმო ლიეტუვის პრეზიდენტმა, გიტანას ნაუსედამ.
• "მთავარი კაშხლის განადგურება ომის დანაშაულია, რომელიც საფრთხეს უქმნის ათასობით ადამიანს. რუსეთმა ამაზე პასუხი უნდა აგოს. უკრაინამ კი ამ ომში გაიმარჯვოს, რათა უსაფრთხოდ იყო".