"ქართულმა ოცნებამ უნდა შეწყვიტოს განსხვავებული აზრის გაჩუმება და გაათავისუფლოს ყველა პოლიტიკური პატიმარი", — ევროპის, ჩრდილოეთ ამერიკისა და ზღვისიქითა ტერიტორიების საკითხებში დიდი ბრიტანეთის სახელმწიფო მინისტრი, სტივენ დაუთი ლელო — ძლიერი საქართველოს ლიდერების მამუკა ხაზარაძისა და ბადრი ჯაფარიძის დაკავებას X-ზე ეხმაურება.

"საქართველოში ოპოზიციის ცნობილი ფიგურების პარლამენტის სესიის ბოიკოტირებისთვის გასამართლება აშკარა ნაბიჯია არჩევნებში კონკურენტების დაბლოკვის მიზნით.

ქართულმა ოცნებამ უნდა შეწყვიტოს განსხვავებული აზრის გაჩუმება და გაათავისუფლოს ყველა პოლიტიკური პატიმარი", — წერს სტივენ დაუთი.

გუშინ, 23 ივნისს ოცნების პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე ბრალდებულ ლელო ძლიერი საქართველოს ლიდერებს, ბადრი ჯაფარიძეს და მამუკა ხაზარაძეს 8-8 თვით პატიმრობა შეუფარდეს. მოსამართლის გადაწყვეტილებით, მათ ასევე აეკრძალა თანამდებობის დაკავება 2 წლის ვადით. ბრალდებულები განაჩენის გამოცხადებას არ დასწრებიან.

ორივე მათგანი შსს-ს წარმომადგენლებმა ლელო ძლიერი საქართველოს ოფისში დააკავეს.