სახალხო დამცველი, ლევან იოსელიანი გუშინ, 2 ივნისს ლაზარე გრიგორიადისის მამის, ბექა გრიგორიადისის დაკავებას ეხმაურება.

რატომ არის მნიშვნელოვანი: გრიგორიადისის პარლამენტთან მაშინ დააკავეს, როდესაც, პროტესტის ნიშნად, კარვის გაშლას ცდილობდა.

• მას პოლიცია გასული დღეების განმავლობაშიც არ აძლევდა კარვის გაშლის შესაძლებლობას.
• შსს მას ადმინისტრაციულ სამართალდარღვევათა კოდექსის 173-ე მუხლის დარღევას ედავება, რაც სამართალდამცველის მოთხოვნისადმი დაუმორჩილებლობას გულისხმობს.

ომბუდსმენის განცხადებით, კარვის გაშლა შეკრების თავისუფლების რეალიზაციის განუყოფელი ნაწილია და მიუთითებს, რომ ამ პოზიციის სისწორეს როგორც საქართველოს საერთო სასამართლოების პრაქტიკა, ასევე, საკონსტიტუციო სასამართლოს განმარტება ადასტურებს.

• "განსაკუთრებით პრობლემური და არაპროპორციულია ეს შეზღუდვა იმ დროს, როცა კარვის განთავსებით არ ხდება შენობის შესასვლელის ბლოკირება ან ტრანსპორტის მოძრაობის შეფერხება".
• "ამასთან, მაშინაც კი, როდესაც, კარვის გამოყენებით, პროტესტს მხოლოდ ერთი ადამიანი გამოხატავს, რაც არ ექცევა შეკრების თავისუფლებით დაცულ სფეროში, იგი მაინც სარგებლობს გამოხატვის თავისუფლებით, რომელშიც ჩარევა არაპროპორციულ ხასიათს ატარებს რელევანტური და სათანადო დასაბუთების გარეშე", — ნათქვამია განცხადებაში.

გარდა ამისა, იოსელიანი იმ კადრებსაც ეხმაურება, სადაც ჩანს, რომ საკანონმდელო ორგანოსთან მშვიდობიანი შეკრების რამდენიმე მონაწილეს პოლიციელები საპროტესტი ბანერებს ართმევენ და ამბობს, რომ ამას სრულიად გაუგებარი მიზეზი და უხეში ფორმა ჰქონდა.

• "რაც არ მოდის შესაბამისობაში სამართალდამცავთა ვალდებულებასთან, ხელი შეუწყონ უფლების სრულფასოვან განხორციელებას, მათ შორის, გამოხატვის სხვადასხვა საშუალების გამოყენებით".
• მოუწოდებს შსს, არ მოახდინოს შეკრებისა და გამოხატვის თავისუფლების გაუმართლებელი შეზღუდვა.

ლაზარე გრიგორიადისის საქმე: რუსული კანონის საწინააღმდეგო აქციის მონაწილე, 21 წლის აქტივისტი, პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

• გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
• დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
• მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
• ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა, რაზეც უარი მიიღო.
• პირველ მაისს გამართულ პროცესზე სასამართლომ გრიგორიადისი პატიმრობაში დატოვა.
• გრიგორიადისის უფლებების დარღვევაზე მისმა ადვოკატმა არაერთხელ ისაუბრა.
• ლიკა ბითაძის თქმით, ბრალდებულს აღიარებითი ჩვენება მეგობრის დაკავების მუქარითა და ადვოკატთან გასაუბრების გარეშე მიაცემინეს, პენიტენციურ დაწესებულებაში კი თავი ნების საწინააღმდეგოდ გადაპარსეს.