რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 29 მარტს დააკავა.

რატომ არის მნიშვნელოვანი: აქტივისტი აპროტესტებდა რუსულ კანონს, რომლის ჩაგდებაც მმართველ გუნდსა და პრორუსულ "ხალხის ძალას" მზარდი საზოგადოებრივი პროტესტის შემდეგ მოუწია.

  • 7-8 მარტის აქციები სამართალდამცველებმა რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით, მოგვიანებით კი დარბევაზე გადავიდნენ: სათითაოდ მისდევდნენ, სცემდნენ და აკავებდნენ პროტესტის მონაწილეებს.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • მმართველი გუნდის თავმჯდომარემ 21 წლის აქტივისტს დღეს "გზას აცდენილი კაცი" უწოდა და თქვა, რომ "ჩანს, ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.

დეტალები: პროკურატურაში აცხადებენ, რომ ე.წ. მოლოტოვის კოქტეილის სროლის შედეგად სპეცრაზმის ორმა თანამშრომელმა დამწვრობა მიიღო, შსს-ის ავტომობილის დაწვით კი ბიუჯეტს 39 500 ლარის ქონებრივი ზიანი მიადგა.

  • მათივე ინფორმაციით, დაკავებულს ბრალდება პოლიციელის ჯანმრთელობის ხელყოფისა (353-ე პრიმა მუხლის მეორე ნაწილი) და ცეცხლის წაკიდებით სხვისი ნივთის დაზიანების (187-ე მუხლის მეორე ნაწილის ა ქვეპუნქტი) მუხლებით წარედგინა.
  • დანაშაული 7-დან 11 წლამდე პატიმრობას ითვალისწინებს.