ბექა გრიგორიადისი საკანონმდებლო ორგანოს წინ კარვის გაშლის მცდელობისას დააკავეს.

დეტალები: როგორც On.ge-ს შსს-ში განუცხადეს, მას ადმინისტრაციულ სამართალდარღვევათა კოდექსის 173-ე მუხლის დარღევას ედავებიან, რაც სამართალდამცველის მოთხოვნისადმი დაუმორჩილებლობას გულისხმობს.

  • ლაზარე გრიგორიადისის მამა რამდენიმე დღეა, პროტესტის ნიშნად, პარლამენტთან კარვის გაშლას ცდილობს, თუმცა პოლიცია ამის საშუალებს არ აძლევს.

ლაზარე გრიგორიადისის საქმე: რუსული კანონის საწინააღმდეგო აქციის მონაწილე, 21 წლის აქტივისტი, პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა, რაზეც უარი მიიღო.
  • პირველ მაისს გამართულ პროცესზე სასამართლომ გრიგორიადისი პატიმრობაში დატოვა.
  • გრიგორიადისის უფლებების დარღვევაზე მისმა ადვოკატმა არაერთხელ ისაუბრა.
  • ლიკა ბითაძის თქმით, ბრალდებულს აღიარებითი ჩვენება მეგობრის დაკავების მუქარითა და ადვოკატთან გასაუბრების გარეშე მიაცემინეს, პენიტენციურ დაწესებულებაში კი თავი ნების საწინააღმდეგოდ გადაპარსეს.