გადაწყვეტილება მოსამართლე ნატო ხუჯაძემ გამოაცხადა.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა, რაზეც უარი მიიღო.

გრიგორიადისის უფლებების დარღვევაზე მისმა უფლებადამცველმა არაერთხელ ისაუბრა.

  • ლიკა ბითაძე ამბობს, რომ ბრალდებულს აღიარებითი ჩვენება მეგობრის დაკავების მუქარითა და ადვოკატთან გასაუბრების გარეშე მიაცემინეს.
  • მისივე თქმით, 21 წლის აქტივისტს პენიტენციურ დაწესებულებაში თავი მისი ნების საწინააღმდეგოდ გადაპარსეს.
  • ოჯახი ითხოვდა, საქმეზე ნაფიც მსაჯულთა სასამართლოს ემსჯელა.

დეტალები: პროცესზე გრიგორიადისის ადვოკატებმა 20 000-ლარიანი გირაოს სანაცვლოდ მისი გათავისუფლება მოითხოვეს, თუმცა მოსამართლემ შუამდგომლობა არ დააკმაყოფილა.

  • სხდომაზე ასევე იმსჯელეს მტკიცებულებების დასაშვებობის შესახებ.