საზოგადოებრივი მაუწყებლის თანამშრომელი, დოდო შონავა, რომელიც მანამდე არხზე საზოგადოებრივ-პოლიტიკური მიმართულების ხელმძღვანელად მუშაობდა, კონსულტანტობას დათანხმდა. მისი გადაწყვეტილების შესახებ შეთავაზების ვადის ამოწურვის ბოლო დღეს, 23 ივნისს გახდა ცნობილი, ხელშეკრულებასაც ამ დროს მოაწერა ხელი.

"მე გავარკვიე დეტალები, კითხვები დავსვი და მივიღე ის პასუხები, რომელიც ფაქტიურად მე მაწყობს - კონსულტირება მუდმივმოქმედი პოზიციაა, რომელიც გულისხმობს ახალი და მიმდინარე ამბებში ყველა მნიშვნელოვანი გადაცემის დაგეგმვასთან და განხორციელებასთან დაკავშირებულ საქმიანობაში ჩართვა. ფაქტიურად, ჩემი გამოცდილების გამოყენების შესაძლებლობა მექნება," - განუცხადა შონავამ On.ge-ს.

შონავას თქმით მიმდინარე და ახალი ამბების ბლოკში მისი ახალი პოზიცია თანამდებობრივად რიგით მეორეა და მისი ზემდგომი მხოლოდ ბლოკის დირექტორი, გიორგი გვიმრაძეა.

"დასახელება [კონსულტანტობა] ცოტაა კი მეხამუშება. ყოველთვის ვიყავი იმ თანამდებობაზე, რომელსაც სრული ფუნქციები ჰქონდა. ახლაც ჩემი კითხვებით დავაზუსტე, რომ ჩემი თანამდებობა იქნება ფუნქციური," - ამბობს შონავა.

რამდენიმე დღის წინ, 20 ივნისს, როცა On.ge-სთვის ცნობილი გახდა, რომ შონავას ახალ თანამდებობას სთავაზობდნენ, ის ამბობდა, რომ კონსულტანტობაზე უარს ამბობდა.

"კონსულტანტი, მრჩეველი მიუღებელი პოზიციებია ჩემი კომპენტენციის ადამიანისთვის, როგორც პოზიცია, თორემ, როგორც უფლება-მოვალეობა, მე მრჩეველიც კარგი ვარ, კონსულტანტიც კარგი ვარ, ექსპერტიც კარგი ვარ და მედია-მენეჯერიც არ ვარ ურიგო," - ასე განმარტავდა შონავა თავის გადაწყვეტილებას On.ge-სთან საუბრისას.

შონავასთვის კონსულტანტობის შეთავაზებას არხის მიმდინარე და ახალი ამბების ბლოკის დირექტორი, გიორგი გვიმრაძე On.ge-სთან საუბრისას ასე ხსნიდა: "[ახალი პოზიცია] იმიტომ შევთავაზეთ მისი გამოცდილების და კომპეტენციის დაკარგვა რომ არ გვინდოდა," - განმარტავს გვიმრაძე შონავასთვის ახალი თანამდებობის შეთავაზების მიზეზებს.

დოდო შონავას დღევანდელი პოზიცია - საზოგადოებრივ-პოლიტიკური მიმართულების ხელმძღვანელის თანამდებობა 17 ივლისიდან უქმდება.