სეულის მუზეუმის დამთვალიერებელმა სტუდენტმა კედელზე მიმაგრებული ბანანი ჩამოხსნა და შეჭამა. ბანანი იტალიელი ხელოვანის, მაურიციო კატელანის, ინსტალაციის ნაწილი იყო. სტუდენტის თქმით, ასე იმიტომ მოიქცა, რომ შიოდა და შემდეგ ბანანის ქერქი ისევ კედელზე მიამაგრა.

ინსტალაცია ბანანის გარეშე სულ რაღაც 1 წუთის განმავლობაში დარჩა. მუზეუმის თანამშრომლებმა ქერქი მალევე აიღეს და ძველის ნაცვლად კედელზე ახალი ბანანი მიამაგრეს. მუზეუმის განცხადებით, ინსტალაციის ბანანს ყოველ მე-2 ან მე-3 დღეს ამ ინციდენტამდეც ცვლიდნენ.

ვიდეო, რომელშიც ჩანს, თუ როგორ იღებს სტუდენტი ბანანს, გემრიელად ჭამს და შემდეგ ქერქს უკან აბრუნებს, ინტერნეტში ვირუსულად გავრცელდა. მედიასთან ინტერვიუში სტუდენტმა განაცხადა, რომ ინსტალაცია ძალაუფლების წინააღმდეგ ამბოხებად აღიქვა.

"ხელოვნების ნიმუშის დაზიანებაც ხელოვნების ნიმუშად შეიძლება აღვიქვათ. ვიფიქრე, რომ ეს საინტერესო იქნებოდა. იქნებ ბანანი კედელზე იმისთვის მიამაგრეს, რომ ვინმეს შეეჭამა?" — განაცხადა სტუდენტმა.

მაურიციო კატელანიმ კი განაცხადა, რომ ასეთი ინციდენტი ინსტალაციისთვის პრობლემას სულაც არ წარმოადგენს და მსგავსი ფაქტი მის კარიერაში პირველად არ მომხდარა.