რატომ არის მნიშვნელოვანი: სუდანში ჯარსა და გასამხედროებულ ძალებს (RSF) შორის შეტაკებებია — დაძაბულობა მას შემდეგ გამწვავდა, რაც მთავრობამ და RSF-მ სამოქალაქო მმართველობაზე გადასვლის შეთანხმებას ვერ მიაღწიეს.

  • დაღუპულია ასეულობით ადამიანი, მათ შორის, მშვიდობიანი მოქალაქეები.
  • გავრცელებული ინფორმაციით, სუდანში საქართველოს 35-მდე მოქალაქე იმყოფებოდა, თუმცა კონკრეტულ ციფრს საგარეო სამინისტროში არ ასახელებდნენ.
  • დაპირისპირებულ ზონაში იყვნენ ქართული ავიაკომპანიების, ჯეო სქაისა და მაი ვეის თანამშრომლები.

დეტალები: უკრაინაში აცხადებენ, რომ დაზვერვის ხელმძღვანელობამ უკრაინის პრეზიდენტის ოფისთან და საგარეო საქმეთა სამინისტროსთან კოორდინაციით, სუდანის ტერიტორიიდან მოქალაქეების ევაკუაციის ოპერაცია წარმატებით ჩაატარა.

  • მათივე თქმით, უწყვეტი ბრძოლის, დაუცველობის, საკვების, წყლისა და შესაბამისი აღჭურვილობების დეფიციტის პირობებში უკრაინის 87 მოქალაქის გამოყვანა შეძლეს.
  • ძირითადად, ისინი ავიაციის სპეციალისტები — პილოტები, ტექნიკოსები იყვნენ.
  • კიევის ინფორმაციითვე, მათთან ერთად ევაკუირებულები არიან საქართველოსა და პერუს მოქალაქეები.
  • ასევე, აცხადებენ, რომ სუდანის ტერიტორიიდან სულ 138 ადამიანია გამოყვანილი, მათ შორის, 35 ქალი და 12 ბავშვია, ისინი ეგვიპტეში არიან გადაყვანილი სამედიცინო დახმარებით, საკვებითა და წყლით უზრუნველყვეს.

საქართველოს საგარეო უწყებამ დღეს გაავრცელა განცხადება, რომ სუდანში საქართველოს აღარცერთი მოქალაქე აღარ იმყოფება.

  • მათი თქმით, სუდანიდან საქართველოს მოქალაქეების ევაკუაციის პირველი ეტაპი დასრულდა და ისინი სუდან-ეგვიპტის საზღვარზე არიან გადაყვანილები.
  • "ამ მომენტისთვის საქართველოს მოქალაქეები იმყოფებიან ნეიტრალურ ზონაში. ველოდებით, რომ გადავიდნენ ეგვიპტეში, საიდანაც მოხდება მათი ტრანსპორტირება შემდეგ სამშობლოში, საქართველოში", — განაცხადა ხვთისიაშვილმა.
  • ხვთისიაშვილს ევაკუაციის პროცესში უკრაინის ჩართულობაზე არაფერი უთქვამს.
  • On.ge დეტალების გასარკვევად საგარეო საქმეთა სამინისტროს დაუკავშირდა, მათ კითხვას პირდაპირ არ უპასუხეს და განგვიცხადეს, რომ "მოქალექეების გამოყვანა მოხდა ქართული მხარის ძალისხმევით და დაგეგმვით".